राधेश्याम कुशवाहा
सर्लाही, ४ भदौं । सर्लाहीको बलरा र गोडैता नगरपालिकामा किशोर किशोरीहरुलाई कसरी सुरक्षित रहने सम्बन्धमा जागरुक बनाउन आत्मरक्षा तालिम सम्पन्न भएको छ ।
दुबै नगरपालिकामा ६२ जना किशोर–किशोरीहरूलाई कसरी सुरक्षित रहन लगायतका सम्बन्धमा लक्षित गरी ३ दिने आत्मरक्षा तालिम सम्पन्न भएको हो ।
गाउँ घरमा हुने हिंसा, दुव्र्यहार र विभेदको विरुद्धमा आयोजित यस तालिममा सहभागीहरुलाई हिंसा हुन नदिन आफुले लिनुपर्ने जिम्मेवारी, हिंसा भइहाले भने प्रतिरक्षा गर्ने शारीरिक र मानसिक विधि, र हिंसा भइसकेपछि गर्नुपर्ने पहलहरु बारे ज्ञान लगायतका तालिममा सिकाइयो । साथै, सामाजिक सञ्जालको कसरी प्रयोग गरेर सुरक्षित रहन सकिन्छ भने समेत तालिममा सिकाइएका थिए ।
सेभ द चिल्ड्रेनको आर्थिक सहयोगमा, राष्ट्रिय रोजगार प्रवद्र्धन केन्द्र मलंगवा, सर्लाहीद्वारा सञ्चालित समुन्नति परियोजना अन्तर्गत उक्त तालिम सम्पन्न भएको बताइएको छ ।
गोडैता नगरपालिकामा भएको तालिमको उदघाटन गोडैता नपा ५ का वडा अध्यक्ष श्रीप्रकास गुप्ता, महिला बालबालिका तथा जेष्ठ नागरिक शाखा प्रमुख बैजु शंकर राउत, र नगर स्तरीय बाल क्लब संजालका अध्यक्ष तथा उपाध्यक्षको उपस्थिति रहेको थियो । यस्तै बलरा नगरपालिकामा आयोजित तालिमको उदघाटन बलरा नपा वडा नम्वर ११ का वडा अध्यक्ष सुखलाल सहनी, पालिका प्रतिनिधि ओमप्रकाश कुशवाहा, नगर स्तरीय बाल क्लब संजालका अध्यक्ष र उपाध्यक्षको उपस्थिति रहेको थियो ।
कार्यक्रमको राष्ट्रिय रोजगार प्रवद्र्धन केन्द्रका अध्यक्ष गायत्री देवीको अध्यक्षतामा सम्पन्न भएको थियो ।
तालिमको सहजीकरण गल्र्स किकले गरेको थियो । गोडैता नगरपालिका ५ स्थित श्रीमती सरस्वती देवी कुशवाहा सामुदायिक विद्यालय र बलरा नगरपालिका ९ स्थित श्री सिताराम माध्यमिक विद्यालयमा सञ्चालन भएको यस तालिममा ६२ भन्दा बढी किशोर–किशोरीहरूको सक्रिय सहभागिता रहेको राष्ट्रिय रोजगार प्रवद्र्धन केन्द्रका बाल संरक्षण अधिकृत अरविन्द प्रसाद कुशवाहाले जानकारी दिए ।