राधेश्याम कुशवाहा
बलरा (सर्लाही), १६ असोज । बलरा नगरपालिकाको बाढी प्रभावित परिवार समक्ष राहत पुर्याउने कार्य सुरु गरिएको छ ।
बलरा नगरपालिका वडा नम्वर ३ का बाढी प्रभावित १५० परिवार समक्ष दात्री निकायद्धारा राहत पुर्याइएको हो ।
सेभ द चिल्ड्रेनको आर्थिक सहयोग तथा बलरा नगरपालिकाको सहकार्यमा राष्ट्रिय रोजगार प्रबद्र्धन केन्द्र द्वारा संचालित समुनन्ती परियोजना अन्तर्गत बाढी पिडित परिवार समक्ष राहत पुर्याउने कार्य गरिएको बलरा नगरपालिकाले जनाएका छन ।
बाढी प्रभावित १५० जना परिवारलाई प्रति परिवार खाना बनाउने वर्तन (भाँडो) एक सेट, पानी फिल्टर १ सेट, त्रिपाल एक सेटमा २ त्रिपाल र एक केजी डोरी सहित, ब्लांकेट १ थान, बाल्टिन सेट जगमग सहित प्रति परिवार ९ हजार बराबरको राहत वितरण गरिएको राष्ट्रिय रोजगार प्रबद्र्धन केन्द्रका अध्यक्ष गायत्री देवीले जानकारी दिईन ।
राहत वितरण गर्दै बलरा नगरप्रमुख रामाशंकर कुशवाहाले आज देखि बलरा नगरपालिकामा बाढीबाट प्रभावित परिवारलाई राहत वितरण सुरु गरेको बताए । बलरा नपा वडा नम्वर ३ मा बाढीबाट सबैभन्दा बढी प्रभावित भएका कारण पहिलो चरणको राहत यहीबाट सुरु गरेका छु, मेयर कुशवाहाले भने । भोलिबाट अन्य वडाहरुमा वितरण गरिने उनले स्पष्ट पारे ।
बलरा बाढी प्रभावित कुनै पनि परिवारलाई राहतबाट बन्चित नगरिने बताउदै मेयर कुशवाहाले नगरमा पूर्ण, आंशिक र न्यून गरी ३ किसिमका डुबानमा परेर घर क्षतिग्रस्त भएका परिवारलाई समुचित रुपमा राहत उपलब्ध गराउने प्रतिबद्धता जाहेर गरे ।
सबैलाई एकैनासको राहत वितरण नगरी प्रभावित तथा क्षतिको विवरण हेरेर मात्रै फरक फरक व्याकेजमा समतामूलक राहत वितरण गरिने उनको भनाई छ ।
केही दिनदेखि परेको अविरल बर्षा र कुलेखानीको बाँधमा पानी सतह बढेपछि खोलिएका ढोकाको कारण बागमती नदीमा पानी सतह तथा बहाब उच्च भई असोज १२ गते बलरा नगरपालिकामा आएको विनासकारी बाढीका कारण नगरका ११ वटा वडाहरुमध्ये ९ वटा वडा प्रभावित भएका थिए । नगरका ६ वटा वडा आंशिक रुपमा क्षति तथा ३ वटा वडामा पूर्ण रुपमा प्रभावित भएको बलरा नगरपालिकाले जनाए ।