रौतहट, २२ जेठ । नेकपा (एकिकृत समाजवादी) का अध्यक्ष माधवकुमार नेपालले आफू कुनै किसिमको अनुचित कार्य गरेको छैन, भ्रष्टाचार जन्य कार्यमा सहभागी छैन् र त्यसो गर्न कसैलाई पनि निर्देशन नदिएको प्रतिक्रिया दिए ।
गृह जिल्ला रौतहट भ्रमणको क्रममा रहनु भएकै बेला अख्तियारले विशेष अदालतमा मुद्दा दायर गरेपछि पूर्व प्रधानमन्त्री नेपालले आफूबाट कुनै त्यस्ता कार्य भएको छ्रैन, बदनियत ढंगबाट आफू विरुद्ध षड्यन्त्र रचिएको प्रतिक्रिया दिए ।
नेपाल प्रधानमन्त्री हुँदाकै समयमा काभ्रेस्थित पतञ्जलि योगपीठ नेपाललाई हदबन्दी भन्दा बढी जग्गा सट्टापट्टा गर्न स्वीकृति दिने मन्त्रिपरिषद्को निर्णयमा आफूले कुनै भ्रष्टाचार नगरेको र कुनै मन्त्रीलाई अनुचित काम गर्न निर्देशन नदिएको दाबी समेत गरे । पूर्व प्रधानमन्त्री नेपालले त्यस्तो कुनै प्रमाण भए पेस गर्न चुनौती दिए । संचारकर्मीले सोधेको प्रश्नको जवाफमा आफूले राज्यलाई हानी नोक्सानी हुने गरी कुनै मन्त्रीपरिषदमा निर्णय नगरेको तथा त्यसका लागि कसैबाट अनुचित लाभ नलिएको दाबी गरे ।
उनले राष्ट्रलाई नोक्सान पुग्ने कुनै पनि कामको आफू सधैं विरुद्धमा रहने प्रतिबद्धतालाई दोहोर्याउदै अख्तियारको अभियोगपत्रमा मन्त्रीलाई निर्देशन दिएको भन्ने आरोपबारे जवाफ दिए । मैले कुनै पनि मन्त्रीलाई यस्तो अनुचित काम गर्न आजसम्म भनेको छैन । यदी त्ससो भनेको छु भने प्रमाणित गर्नुपर्यो उनले भने ।
पतञ्जलि योगपीठसँग सम्बन्धित जग्गा प्रकरणबारे बोल्दै अध्यक्ष नेपालले त्यस्ता संस्थाहरूमा स्वामी रामदेव र आचार्य बालकृष्ण जस्ता व्यक्तित्वहरू संलग्न रहेको र नेपालमा योगको प्रचारप्रसार तथा आयुर्वेद औषधिहरूको उत्पादन होस भन्ने सकारात्मक उद्देश्यबाट उक्त निर्णय लिएको थियो ।
कुनै सरकारी जग्गा अनुचित रूपमा दिइएको छैनन । यदि कुनै प्रक्रियागत क्रुटी भएको वा आवश्यकताले गर्दा हदबन्दीभन्दा माथिको जग्गाको विषय आएको भए पनि, र त्यो उचित छैन भने, ती जग्गाहरू सबै फिर्ता लिन सकिन्छ । तर त्यसमा कुनै बदमाशी वा नियत खराब नभएको प्रष्ट पारे ।