रौतहट, ६ मंसिर । अर्काकी श्रीमतीलाई भगाएर धनधरम लिने वडा सदस्य सतलाल दास अन्ततः पक्राउ परेका छन् ।
रौतहटको कटहरिया नगरपालिका–१ बाट वडा सदस्य पदमा निर्वाचित भएका दास तीन सन्तानकी आमालाई भगाएर फरार लगेको समाचार सार्वजनिक भएपछि प्रहरीले शुक्रवार गौरबाट पक्राउ गर्न सफल भएका हुन् ।
विभिन्न विकास कार्यमा प्रयोग गर्न उपभोक्ता समितिको सचिव बनाइ आफ्नै वडाकी विवाहित दलित महिलालाई ललाइ–फकाइ प्रेम जालमा पारेर भगाएर लगेको गम्भीर आरोप निर्वाचित जनप्रतिनिधि दासमाथि लागेको छ ।
चार छोराछोरीका बुवा रहेका दासले तीन सन्तानकी आमासँग ‘सम्बन्ध’ बढाउँदै घरदेखि पैसा, सुनचाँदी र जग्गा सम्म लिएको पीडित परिवारको गम्भीर आरोप छ । दासले धन र धर्म दुबै लिएर समाजलाई विगार्ने कार्य गरेको छ ।
उक्त घटनापछि सामाजिक सञ्जालदेखि स्थानीय राजनीतिक वृत्तसम्म तातेको माहोललाई लिएर जातीय संगठन ‘राष्ट्रिय तत्मा समाज’ समेत सक्रिय बने । समाजका पूर्व अध्यक्ष राजकुमार दास, महासचिव शंकर दास तत्मा, सल्लाहकार मदन दास लगायतको टोली बिहीबार पीडित परिवार, स्थानीय अगुवासँग निरन्तर छलफल गरेका थिए ।
पीडित महिलाका बुबाका अनुसार, २०७२ सालमा विवाह भएकी छोरीलाई वडा सदस्य दासले उपभोक्ता समितिको सचिव बनाएपछि दुवैबीच ‘नजदिकी’ बढ्दै गएको थियो । विदेशमा रहेका छोरीका श्रीमान कृष्णनन्दन दासले पठाइएका करिब १२ लाख रुपैयाँ, करिब ३ लाख बराबरका सुनचाँदीको गहना समेत वडा सदस्यले लिएको आरोप छ ।
छोरीको नाउँमा रहेको पाँच कठ्ठा जग्गा समेत दासले धरौटी राखेर पैसा निकालेको महिलाको बुबाले बताए । परिवारका अनुसार महिलाले पछिल्ला महिनामा तीन साना छोरालाई घरमै छोडेर बाराको निजगढमा दाससँगै भाडाको कोठामा बस्दै आएकी थिइन् ।
स्थानीयहरु निकै खोजबिनपछि दुवै एकै कोठाबाट भेटिए पछि बारा प्रहरीले ईलाका प्रहरी कार्यालय गरुडामा बुझाएको थियो । सोहिदिन कटहरियाका मेयर अजय प्रकाश जैसवालको पहलमा दुवैजना लाई जिम्मा जमानीमा छोडिएको थियो ।
जिल्ला प्रहरी कार्यालय रौतहटका प्रवक्ता डिएस्पी विष्णु प्रदीप बस्यालले विदेशबाट पठाएको रकम, गहना र जग्गा सम्बन्धी प्रमाण पेश भएमा दासविरुद्ध कानुनी कारबाही र क्षतिपूर्ति तिनुपर्ने बताए ।
उता महिलाले आफू घरमा शारीरिक–मानसिक हिंसा सहन बाध्य भएकाले ‘सुरक्षाका कारण’ घर छाडेको बताइरहेकी छन् ।
दासको क्रियाकलापबाट सात बालबालिकाको भविष्य अन्धकारमय मात्र होइन, विदेशमा रोजगारीमा रहेका युवाहरूले कसको खातामा पैसा पठाउने भन्ने विषयमा गम्भीर बहस उठाइदिएको छ ।
जिल्ला प्रहरी कार्यालय रौतहटले पक्राउ परेका वडा सदस्य दासलाई नियन्त्रणमा लिएर घटना बारे आवशयक अनुसन्धान गरिरहेको डिएसपी बस्यालले बताए ।