रौतहट, ६ पुस । धनुषाको तुल्सीयाहीमा भारतीय सहयोगमा निर्माण कार्य सम्पन्न भएका विद्यालय भवनको एक समारोहका बीच उदघाटन भएर समुदायलाई हस्तान्तरण गरिएका छन् ।
भारत सरकारको आर्थिक सहयोगमा धनुषाको मुखियापट्टीको तुल्सीयाही स्थित बैद्यनाथ देवनारायण पब्लिक मोडेल माध्यमिक विद्यालयको नवनिर्मित पक्कि भवनको एक समारोहका बीच महावाणिज्यदूत देवी सहाय मिना र मुखियापट्टी मुसहरनिया गाउँपालिका अध्यक्ष जयकुमार यादवले संयुक्त रुपमा उदघाटन गरेर समुदायमा हस्तान्तरण गरिएका हुन् ।
भारतीय महावाणिज्य दूतावास बीरगञ्जद्वारा जारी भएको प्रेस नोटमा, उच्च प्रभाव सामुदायिक विकास परियोजना (एचआईसीडीपी) अन्तर्गत उक्त विद्यालय भवनलाई समृद्ध एवं सुविधासम्पन्न रुपमा निर्माण गरिएको छ ।
उक्त माध्यमिक विद्यालय धनुषा जिल्लाको प्रमुख सामुदायिक विद्यालय मध्येको नमूना विद्यालयको रुपमा रहेको छ । वाल विकास देखि लिएर कक्षा १२ सम्म अध्ययपन हुने उक्त विद्यालयको भवन निर्माण भएपछि अध्ययनरत छात्रछात्राहरुलाई निकै टेवा पुग्ने विश्वास महावाणिज्यदूतावासले लिएको छ ।
प्राविधिक शिक्षा तथा व्यवसायी तालिम परिषद (सिटिइभिटी) संग आबद्ध रहेर कम्प्युटर कक्षा १८ महिनाको प्रि डिप्लोमा अध्ययन भईरहेको तथा विद्यालयमा कुल संख्याको ६० प्रतिशत छात्राहरुको अध्ययन अध्यापनमा निकै टेवा पुग्ने र शिक्षकहरुलाई पनि शिक्षा प्रदान गर्न सजिलो भएको बताउदै महावाणिज्यदूत सहायले भारत सरकारले नेपाली जनताको हरेक क्षेत्रमा आर्थिक सहयोग गर्ने कार्यमा दृढ संकल्पित रहेको स्पष्ट पारे ।
गाउँपालिका अध्यक्ष, विद्यालय व्यवस्थापन र अन्य सरोकारवालाहरूले भारत सरकारले प्रदान गरेको विकास सहयोगको लागि प्रशंसा गरेका छन् । उनीहरूले नयाँ निर्माण भएको पूर्वाधारबाट यस क्षेत्रको सिकाइ वातावरणलाई अभिवृद्धि गर्न र शिक्षा क्षेत्रलाई बलियो बनाउन मद्दत पुगेको विश्वास व्यक्त गरे ।
छिमेकीको रूपमा, भारत र नेपाल व्यापक र बहु–क्षेत्रीय सहयोगमा संलग्न छन् । एचआईसीडीपीहरूको कार्यान्वयनले प्राथमिकताका क्षेत्रहरूमा पूर्वाधार विस्तार गर्नुका साथै वृद्धि र विकास हासिल गर्न नेपाल सरकारको प्रयासहरूलाई बलियो बनाउन भारत सरकारको निरन्तर समर्थनलाई दर्शाउछन् ।