रौतहट, १ फागुन । आम जनता पार्टी (आजपा) ले प्रतिनिधिसभा सदस्य निर्वाचन २०८२ का लागि आफ्ना चुनावी घोषणापत्र शुक्रबार सार्वजनिक गरेका छन् ।
काठमाडौंको भ्रिकुटी मण्डपमा आयोजित पत्रकार सम्मेलनमा पार्टी अध्यक्ष एवं पूर्वमन्त्री प्रभु साह, वरिष्ठ पत्रकार एवं नेता ऋषिराज धमला र सहअध्यक्ष तिलक थापा मगर लगायत नेताहरूले संयुक्त रुपमा घोषणापत्र सार्वजनिक गरेका हुन् ।
‘एक घर–एक रोजगारी’, कर सीमा २०% र राइट टु रिकलसहित संरचनागत सुधारको प्रस्ताव
घोषणापत्रमा प्रत्यक्ष निर्वाचित कार्यकारी प्रणाली, करको संवैधानिक सीमा र शिक्षा–स्वास्थ्य सहित आधारभूत सेवा निःशुल्क उपलब्ध गराउने जस्ता महत्वाकांक्षी एजेन्डा अघि सारिएको छ । शासन प्रणालीदेखि अर्थतन्त्र, शिक्षा, स्वास्थ्य, पूर्वाधार, कृषि, ऊर्जा र वैदेशिक नीति सम्म संरचनागत परिवर्तन गर्ने प्रतिबद्धता पार्टीले जनाए ।
प्रत्यक्ष कार्यकारी र पूर्ण समानुपातिक प्रणाली
आजपाले प्रधानमन्त्री र मुख्यमन्त्री प्रत्यक्ष निर्वाचित हुने व्यवस्था गर्ने प्रस्ताव गरेको छ । संघ र प्रदेशमा पूर्ण समानुपातिक निर्वाचन प्रणाली लागु गर्ने तथा निर्वाचित जनप्रतिनिधिलाई काम नगरेमा कार्यकालमै फिर्ता बोलाउन पाउने ‘राइट टु रिकल’ अधिकार सुनिश्चित गर्ने घोषणापत्रमा उल्लेख गरिएको छ ।
सरकारले कुल गार्हस्थ उत्पादनको २० प्रतिशत भन्दा बढी कर लगाउन नपाउने संवैधानिक व्यवस्था गर्ने प्रस्ताव पनि पार्टीले अघि सारेको छ । गैरआवासीय र विदेशीलाई नागरिकता दिने प्रावधान पुनरावलोकन गर्ने एजेन्डा समेत समावेश गरिएको छ ।
भ्रष्टाचार नियन्त्रण र न्यायिक सुधार
भ्रष्टाचारविरुद्ध जनताको प्रत्यक्ष निगरानी रहने विशेष कानुनी संरचना बनाउने, सरकारी खर्च र विकास आयोजनाको विवरण अनलाइन मार्फत सार्वजनिक गर्ने तथा नीतिगत भ्रष्टाचारमा संलग्नको सम्पत्ति जफत गर्ने प्रस्ताव घोषणापत्रमा समेटिएको छ ।
न्यायालयलाई पूर्ण डिजिटलीकरण, पारदर्शी नियुक्ति प्रणाली र न्यायिक सुधार मार्फत सुशासन सुदृढ गर्ने योजना पनि सार्वजनिक गरे ।
‘एक घर–एक रोजगारी’ र आईटी हबको लक्ष्य
आजपाले ‘एक घर, एक रोजगारी’ कार्यक्रम लागु गर्ने र बेरोजगारलाई बेरोजगारी भत्ता दिने घोषणा गरे । नेपाललाई ‘ग्लोबल आईटी हब’ बनाउने लक्ष्यसहित युवा उद्यमीलाई १० देखि २५ लाख रुपैयाँ सम्म बीउ पुँजी (सीड मनी) उपलब्ध गराउने योजना पनि सार्वजनिक गरे ।
हरेक विद्यार्थीले कम्तीमा एक उच्च प्राविधिक सीप अनिवार्य रूपमा सिक्नुपर्ने व्यवस्था गर्ने प्रतिबद्धता घोषणापत्रमा उल्लेख गरिएको छ ।
शिक्षा, स्वास्थ्य र आधारभूत सेवा निःशुल्क
पूर्ण साक्षर राष्ट्र अभियान, स्मार्ट कक्षाकोठा र ‘एक स्थानीय तह, एक खेलमैदान’ कार्यक्रम लागू गर्ने योजना अघि सारिएको छ । स्वास्थ्य क्षेत्रमा डिजिटल हेल्थ कार्ड, गम्भीर रोगको पूर्ण निःशुल्क उपचार र प्रत्येक पालिकामा विशेषज्ञ अस्पताल स्थापना गर्ने प्रतिबद्धता पनि जनाइएको छ ।
शिक्षा, स्वास्थ्य, खानेपानी र विद्युत् आधारभूत रूपमा निःशुल्क उपलब्ध गराउने घोषणा आजपाले गरे ।
पूर्वाधार, ऊर्जा र आवासमा नयाँ दृष्टिकोण
मुख्य राजमार्ग स्तरोन्नति, सडक सुरक्षामा उच्च प्रविधि निगरानी, सार्वजनिक पार्किङ व्यवस्था, अप्टिकल फाइबर विस्तारसहित डिजिटल करिडोर विकास गर्ने योजना सार्वजनिक भएको घोषणापत्रमा समावेश छ ।
विद्युत् उत्पादन तथा निर्यात वृद्धि गर्दै ‘हिमालयन ओरिजिन’ ब्रान्ड मार्फत बोतलको पानी अन्तर्राष्ट्रिय बजारमा प्रवद्र्धन गर्ने लक्ष्य पनि पार्टीले लिएको छ । भूमिहीनका लागि ‘भर्टिकल हाउजिङ’ र योजनाबद्ध नयाँ सहर विकास गर्ने प्रतिबद्धता समेत सार्वजनिक गरियो ।