रौतहट, २० वैशाख । काठमाडौंमा दक्षिण एसियाली व्यापार जगतलाई एकै थलोमा जोड्ने बहुप्रतीक्षित “साउथ एसिया ट्रेड फेयर २०२६” को तयारी अन्तिम चरणमा पुगेको छ ।
आउदो बिहीबार मे ७ देखि ११ (वैशाख २४–२८) सम्म प्रदर्शनीमार्ग स्थित भृकुटीमण्डपमा आयोजना हुने अन्तर्राष्ट्रिय मेलाले लामो समय देखि सुस्त रहेको व्यापारिक गतिविधिलाई पुनः गति दिने अपेक्षा गरिएको हो ।
सार्क क्षेत्रका विभिन्न देशबाट सहभागीहरू काठमाडौं आइपुग्ने क्रम सुरु भइसकेको छ । भारत, बङ्गलादेश, नेपाल, भुटान, पाकिस्तान, अफगानिस्तान, श्रीलंका र माल्दिभ्सका प्रदर्शकहरू सहभागी हुने यस मेलालाई क्षेत्रीय व्यापार सहकार्यको महत्वपूर्ण प्लेटफर्मका रूपमा हेरिएको छ ।
इन्ट्रोडक्शन ट्रेड शोज नेपाल प्रा.लि. द्वारा आयोजना हुने मेलामा बङ्गलादेशको उद्योग मन्त्रालय तथा एक्सपोर्ट प्रोमोसन ब्यूरोको सहकार्य रहेको छ भने भुटान सरकारको उद्योग, वाणिज्य तथा रोजगारी मन्त्रालयको समेत समर्थन प्राप्त रहेको छ ।
नेपाल चेम्बर अफ कमर्स देखि विभिन्न उद्योग तथा व्यापारिक संस्थाहरूको व्यापक साथले कार्यक्रमलाई अझ बलियो बनाएको बताइएको छ । आयोजकका अनुसार करिब १५० भन्दा बढी प्रदर्शकहरू सहभागी हुनेछन् भने झण्डै एक लाख स्थानीय अवलोकन कर्ता र ५ हजार अन्तर्राष्ट्रिय तथा व्यावसायिक प्रतिनिधिहरूको उपस्थिति रहने अपेक्षा गरिएको छ ।
मेला संयोजक सुमन महर्जनका अनुसार यो कार्यक्रम उत्पादन प्रवद्र्धन, बजार विस्तार र क्रेता–बिक्रेताबीच सहकार्य बढाउने सुनौलो अवसर हुनेछ । मेलामा कपडा, सौन्दर्य सामग्री, हस्तकला, कृषि उत्पादन, सूचना प्रविधि, सवारी साधन, फर्निचर देखि घरेलु उपकरण सम्मका विविध क्षेत्रका उत्पादनहरू प्रदर्शनीमा राखिने छन् । साथै, व्यापारिक भेटघाट, फुड फेस्टिवल, रक्तदान तथा मनोरञ्जनात्मक कार्यक्रमहरूले मेलालाई अझ आकर्षक बनाउने बताइएका छन् । आर्थिक सुस्तता र लगानीगत अनिश्चितता बीच आयोजना हुन लागेको यो मेला निजी क्षेत्रका लागि नयाँ ऊर्जा र सम्भावना सिर्जना गर्ने प्रमुख माध्यम बन्ने विश्वास गरिएको छ । आयोजकले ब्रान्ड प्रवद्र्धन र व्यापार विस्तार गर्न इच्छुक सम्पूर्ण व्यवसायीहरूलाई सहभागिताका लागि खुला आह्वान गरेका छन् ।