चन्द्रपुर (रौतहट), ३१ वैशाख । आदिवासी जनजाति महासंघ जिल्ला समन्वय परिषद् रौतहट तथा आदिवासी जनजाति महासंघ नगर समन्वय परिषद् चन्द्रपुरले भूमिहीन, सुकुम्बासी तथा अव्यवस्थित बसोबासीलाई उठीवास नगराउन माग गर्दै चन्द्रपुर नगरपालिका र डिभिजन वन कार्यालयमा ज्ञापनपत्र बुझाएका छन् ।
महासंघका जिल्ला अध्यक्ष नरेन्द्रबहादुर राना र नगर अध्यक्ष राजु धामीले संयुक्त रूपमा ज्ञापनपत्र बुझाउँदै चन्द्रपुर नगरपालिकाले वैशाख २४ गते जारी गरेको सूचना प्रति गम्भीर असहमति जनाएका हुन् । उक्त सूचनामा ३५ दिन भित्र एलानी तथा पर्ती जग्गा खाली गर्न निर्देशन दिइएको थियो ।
महासंघले सरकार र सम्बन्धित निकायले वास्तविक भूमिहीन, सुकुम्बासी तथा अव्यवस्थित बसोबासीको तथ्यांक संकलन गरी उचित व्यवस्थापन गर्नुपर्ने तर त्यसो नगरी सीधै घरबारविहीन बनाउने प्रयास गरिएको भन्दै आपत्ति जनाए ।
ज्ञापनपत्र मार्फत गरिब तथा विपन्न समुदायको आवासको अधिकार सुनिश्चित गर्न, वैकल्पिक व्यवस्था विना हटाउने कार्य तत्काल रोक्न तथा मानवीय संवेदनालाई मध्यनजर गर्दै समाधान खोज्न सम्बन्धित निकायको ध्यानाकर्षण गराए ।
महासंघका नेताहरूले दीर्घकालीन समाधानका लागि सरकार, स्थानीय तह र सरोकारवाला निकायबीच समन्वय आवश्यक रहेको ज्ञापन पत्र मार्फत धारणा राखेका छन् ।

बजार व्यवसायलाई चलायमान बनाउन गौरमा मंसिर ६ देखि ‘रौतहट एक्सपो २०८३’, लण्डन ब्रिज र जलपरी मुख्य आकर्षण
गौर आँखा अस्पतालद्वारा मौलापुरमा निःशुल्क आँखा शिविर, ३२६ जनाको परीक्षण, ७६ जना शल्यक्रियाको लागि छनौंट
उमेर हद खारेजीको माग गर्दै विगत १८ दिन देखि आन्दोलनरत वागमती सिंचाई आयोजनाका कर्मचारी प्रति राज्य उदाशिन