रौतहट, ११ जेठ । रौतहटको चन्द्रपुर नगरपालिकाले साविककै व्यवस्था अनुसार आइतबार पनि विद्यालय सञ्चालन गर्ने निर्णय गरेपछि स्थानीय शिक्षकहरूले गम्भीर आपत्ति जनाउदै नगरपालिकामा ज्ञापन पत्र बुझाएका छन् ।
संघीय सरकार र स्थानीय तहको निर्णय बाझिँदा शैक्षिक क्षेत्रमा अन्योल सिर्जना भएको भन्दै सुबलाल भागवत माध्यमिक विद्यालयका शिक्षकहरूले नगर कार्यपालिकाको कार्यालयलाई ज्ञापनपत्र बुझाएका हुन् ।
संघीय सरकारको मन्त्रीस्तरीय निर्णय अनुसार शैक्षिक सत्र २०८३ देखि देशभरका सामुदायिक तथा संस्थागत विद्यालयमा हप्ताको दुई दिन शनिबार–आइतबार बिदा दिने व्यवस्था गरिएको थियो । सोही निर्णय कार्यान्वयनका लागि शिक्षा तथा मानव स्रोत विकास केन्द्रले समेत परिपत्र जारी गरिसकेको छ ।
तर चन्द्रपुर नगरपालिकाले गत जेठ ४ गते सूचना जारी गर्दै पुरानै व्यवस्था कायम राखी आइतबार पनि विद्यालय सञ्चालन गर्न निर्देशन दिएपछि शिक्षकहरू असन्तुष्ट बनेको छ ।
शिक्षकहरू संघीय सरकारको निर्णय विपरीत स्थानीय तहबाट फरक निर्णय आउँदा विद्यालय प्रशासन, शिक्षक, विद्यार्थी तथा अभिभावक माझ अन्योल र असहज अवस्था सिर्जना भएको बताए । उनीहरूले शैक्षिक नीतिमा एकरूपता कायम गर्न तथा संघीय सरकारको निर्णय कार्यान्वयन गर्न नगरपालिकासँग माग गरे ।
ज्ञापनपत्र मार्फत शिक्षकहरूले शिक्षण सिकाइको वातावरणलाई थप व्यवस्थित बनाउन स्पष्ट नीति आवश्यक रहेको उल्लेख गर्दै विद्यार्थी तथा शिक्षकको हितलाई केन्द्रमा राखेर निर्णय लिन आग्रह गरेका छन् ।
बजार व्यवसायलाई चलायमान बनाउन गौरमा मंसिर ६ देखि ‘रौतहट एक्सपो २०८३’, लण्डन ब्रिज र जलपरी मुख्य आकर्षण
गौर आँखा अस्पतालद्वारा मौलापुरमा निःशुल्क आँखा शिविर, ३२६ जनाको परीक्षण, ७६ जना शल्यक्रियाको लागि छनौंट
उमेर हद खारेजीको माग गर्दै विगत १८ दिन देखि आन्दोलनरत वागमती सिंचाई आयोजनाका कर्मचारी प्रति राज्य उदाशिन