सर्लाही, १७ भदौं । बलरा नगरपालिका–४ स्थित श्री रामसखरी माध्यमिक विद्यालयका प्रधानाध्यापक वीरेन्द्र झामाथि विद्यालय परिसरमै विद्यार्थीबाट भएको कुटपिटका घटनाप्रति नेपाल शिक्षक संघ, मधेश प्रदेश कार्यसमितिले गम्भीर आपत्ति जनाएको छ ।
शिक्षक संघले प्रेस विज्ञप्ति जारी गर्दै विद्यालय जस्तो ज्ञान, संस्कार र अनुशासन सिकाउने पवित्र थलोमै शिक्षक कुटिनु गम्भीर र चिन्ताजनक घटना भएको जनाएको हो ।
शिक्षक र विद्यार्थी बीचको सम्बन्धलाई कमजोर बनाउने तथा हिंसात्मक व्यवहारलाई प्रश्रय दिने कुनै पनि गतिविधि स्वीकार्य नहुने संघको भनाइ छ ।
संघले शिक्षक प्रति कुनै गुनासो वा असहमति भए हिंसाको बाटो नभई संवाद, छलफल, तर्क, प्रमाण र संस्थागत प्रक्रिया मार्फत समाधान खोज्नु पर्ने जनाए । विद्यार्थीले आफ्ना अधिकारका विषयमा प्रश्न र जिज्ञासा राख्न पाउने भए पनि अधिकारसँगै कर्तव्य, स्वतन्त्रता सँगै अनुशासन र असहमति सँगै मर्यादा आवश्यक रहेको विज्ञप्तिमा उल्लेख छ ।
त्यसैगरी, शिक्षक तथा विद्यालय नेतृत्वले पनि विद्यार्थीका समस्या र गुनासालाई धैर्यपूर्वक सुन्ने, उनीहरूको मनोभाव बुझ्ने तथा समस्या समाधानका लागि सकारात्मक वातावरण निर्माण गर्नुपर्ने शिक्षक संघले जनाए ।
‘ज्ञान र संस्कारको केन्द्रमै संवादको स्थान हिंसाले लिन थाल्यो भने भावी पुस्तालाई कस्तो समाज हस्तान्तरण गर्ने ?’ भन्दै संघले यस घटना प्रति गम्भीर आत्मसमीक्षाको आवश्यकता देखाएको छ ।
नेपाल शिक्षक संघ, मधेश प्रदेश कार्यसमितिले घटनाको निष्पक्ष छानबिन गरी सत्यतथ्यका आधारमा आवश्यक प्रक्रिया अघि बढाउन सम्बन्धित निकायसँग माग गरेको छ । साथै प्रधानाध्यापक, शिक्षक र विद्यार्थी सबैको सुरक्षा, सम्मान तथा मर्यादा सुनिश्चित गर्दै विद्यालयमा पुनः सौहार्दपूर्ण र विश्वासपूर्ण वातावरण निर्माण गर्न विद्यालय प्रशासन, स्थानीय तह, अभिभावक तथा सरोकारवाला पक्षसँग प्रदेश अध्यक्ष परशुराम यादवले अपिल गरे ।
बजार व्यवसायलाई चलायमान बनाउन गौरमा मंसिर ६ देखि ‘रौतहट एक्सपो २०८३’, लण्डन ब्रिज र जलपरी मुख्य आकर्षण
गौर आँखा अस्पतालद्वारा मौलापुरमा निःशुल्क आँखा शिविर, ३२६ जनाको परीक्षण, ७६ जना शल्यक्रियाको लागि छनौंट
उमेर हद खारेजीको माग गर्दै विगत १८ दिन देखि आन्दोलनरत वागमती सिंचाई आयोजनाका कर्मचारी प्रति राज्य उदाशिन