मर्निङवाकमा निस्किएका रायमाझीको ट्रकको ठक्करबाट मृत्यु

सर्लाही, २७ भदौं । मर्निङवाकमा निस्किएका व्यक्तिको ट्रकको ठक्करबाट सोमवार विहान मृत्यु भएको छ ।
पुर्व पश्चिम राजमार्ग अन्तर्गत पर्ने सर्लाहीको हरिवन नगरपालिका १० नयाँ रोडमा आज विहान ना. ८ ख. ८२६७ नम्वरको ट्रकले हरिवन नपा ९ का ५० बर्षिय रामचन्द्र रायमाझीलाई ठक्कर दिदा निजको मृत्यु भएको हो ।
रायमाझी विहानै ४ बजेको समयमा घरबाट मनिंङवाकमा निस्किएका थिए । सिरहाको मिर्चैयाबाट गहुँ लिएर हेटौडा तर्फ गइरहेका ट्रकले ठक्कर दिदा निजको घटनास्थलमै मृत्यु भएको इलाका प्रहरी कार्यालय हरिवनले जनाएको छ । ठक्कर दिने ट्रक पनि राजमार्गमै पल्टिएपछि प्रहरीले चालकलाई नियन्त्रणमा लिएर आवश्यक अनुसन्धान गरिरहेको प्रहरी निरीक्षक मुकेश ताम्राकारले बताए ।
मृतक रायमाझीको शव प्रादेशिक अस्पताल मलंगवामा पोष्टमार्टम गरिएको बताइएको छ ।