पाकिस्तानी आतंकवादी भारतमा घुसपैठ गरिरहेको श्रव्य दृष्य सार्वजनिक

नयाँ दिल्ली । आतंकवादीहरुलाई संरक्षण एवं प्रशिक्षित गराउदै आएका पाकिस्तानबाट यतिखेर भारतीय भुमितर्फ आतंकवादीहरु प्रवेश गर्न खोजिरहेको श्रब्य दृष्यहरु सार्वजनिक भएका छन् ।
भारत र पाकिस्तानबीच जारी रहेको विवादको कारण कश्मीरको उरी क्षेत्रबाट पाकिस्तानी आतंकवादीहरुले भारतीय भूमितर्फ प्रवेश गर्न खोजिरहेको भिडियो सार्वजनिक भएका हुन् ।
उरी क्षेत्रमा जडान गरिएको विद्युतीय निगरानी उपकरणमा तीन आतंकवादीहरु भारतीय भूमिमा प्रवेश गर्न खोजिरहेको दृश्य रेकर्ड भएको भारतीय समाचार संस्था एएनआईले जनाएको छ । तर भारतीय सैनिक कारवाहीका क्रममा तीनै जना आतंकवादीहरु मारिएको समेत एएनआईले जनाएको छ ।
‘गोप्य स्रोतले दिएको जानकारी पछि विद्युतीय निगरानी उपकरणमा तीन आतंकवादीहरुको पहिचान भएको थियो । सेनाको तैनाथ दस्ताको कारवाहीमा उनीहरुको मृत्यु भएको छ ।’ नाम नखुलाइएका सैनिक अधिकारीलाई उद्धृत गर्दै एएनआईले जनाएको छ ।
सैनिक कारवाहीका क्रममा उनीहरुको शव, र सोही स्थानबाट दुई एके राइफल र एक चिनियाँ एम १६ राइफल बरामद गरिएको भारतीय सेनाको गोप्य श्रोतको उल्लेख गर्दै एउनआईको रिपोर्टमा उल्लेख गरिएको छ ।