सशस्त्र प्रहरीमा एकैपटक ८४८८ जवानको सरुवा

काठमाडौं, २९ मंसिर । सशस्त्र प्रहरी बल नेपालले एकैपटक ८४८८ जवानको सरुवा गरेको छ ।
सरुवा गर्न केही समय अघि देशभरका जवानहरूलाई उनीहरूको प्राथमिकता अनुसार तीन वटा युनिटको नाम लेखाएर फारम भर्न लगाएका थिए । सोही अनुसार सम्भव भएका माग गरे वमोजिमको कार्यालय र सम्भव नभएका नजिकको अर्को युनिटमा सरुवा गरिएको सशस्त्र प्रहरी बल मुख्यालयका सहायक प्रवक्ता डिएसपी शैलन्द्र थापाले बताए ।
यसैगरी सीमावर्ती इलाकाको विभिन्न युनिटहरूमा लामो समय दरबन्दी भएका जवानहरूलाई सीमा इलाका बाहेक अन्यत्र सरुवा गरिएको छ । सरुवाको लागि मुख्यालय स्थित उजुरी तथा गुनासो सुनुवाइ शाखामा प्राप्त निवेदन तथा गुनासोलाई समेत उच्च प्राथमिकतामा राखिएको थियो ।
मुख्यालयले फारम भराएर जवानहरूको इच्छा अनुसारको कार्यालयमा सरुवा गरेको यो पहिलो पटक हो । यसबाट तल्लो दर्जाको कर्मचारीको मनोबल उच्च हुने र आगामी दिनमा सरुवा सम्बन्धी गुनासो कम हुँदै जाने विश्वास मुख्यालयको छ ।