सर्वोच्च अदालतमा विचाराधिन अवस्थामा रहेका स्टिङ अपरेशनका ४ सय मुद्दा खारेज हुने

तराई टप संवाददाता
काठमाडौं, ८ वैशाख । अख्तियार दुरुपयोग अनुसन्धान आयोगले पछिल्लो विभिन्न समयमा गरेको स्टिङ अपरेशनको प्रमाण ग्रहण योग्य नरहेको हुँदा स्टिङ अपरेशनको आधारमा मात्रै सर्वोच्चमा दायर गरिएका ४ सय मुद्दा खारेज हुने भएका छन् ।
सर्वोच्च अदालतको संवैधानिक इजलासले बुधबार स्टिङ अपरेशन गरेर संकलित प्रमाण ग्रहण योग्य नरहेको भन्दै सुनुवाइ नभइसकेका वा न्यायिक प्रक्रियामा रहेका सबै मुद्दाहरु खारेज हुने गरी आदेश दिएको हो ।
आदेशमा भनिएको छ, “स्टिङ अपरेशन फौजदारी न्यायको मान्य सिद्धान्त, कानुनको उचित प्रक्रिया र प्रमाण संकलन सम्बन्धी न्यायिक मान्यताका दृष्टिले समेत मनासिव र तार्किक नदेखिएको उक्त प्रावधान अनुसन्धान अधिकारीलाई स्वेच्छाचारी तवरबाट कार्य गर्न प्रोत्साहित गर्ने प्रकृतिको देखियो ।”
अदालतको आदेशसँगै बदर भएका मुद्दामध्ये अधिकांश २०७० सालपछिका छन् । लोकमान सिंह कार्की प्रमुख आयुक्त भएयता अख्तियारले स्टिङ अपरेशनलाई अभियानकै रुपमा सञ्चालन गरेको थियो । अख्तियारको स्टिङ अपरेशन विरुद्ध अधिवक्ता विष्णुप्रसाद घिमिरेले सर्वोच्च अदालतमा रिट दायर गरेका थिए ।