भारत निर्यातमा आधारित अर्थतन्त्र बन्ने अल्फबेटका सिईओ सुन्दर पिचाइको दाबी

   २५ पुष २०७९, सोमबार ११:०३  

वासिंगटन, एजेन्सी । अमेरिकी प्रविधि कम्पनी अल्फबेटका प्रमुख कार्यकारी अधिकारी (सिईओ) सुन्दर पिचाइले भारत निर्यातमा आधारित अर्थतन्त्र बन्ने दाबी गरेका छन् ।
खुला एवं विस्तृत इन्टरनेटको वातावरण रहेका कारण भारत निर्यातमा आधारित अर्थतन्त्र बन्ने पिचाइले दाबी गरेका हुन् ।
उनले भारतीय ‘स्टार्टअप मा अल्फबेट र अल्फबेटको सहायक कम्पनी गुगलले आफ्नो ध्यान केन्द्रित गरिरहेको बताउँदै यस्ता भारतीय स्टार्टअपमा ३० करोड डलर लगानी गर्ने तयारी भइरहेको समेत बताए ।
भारतीय आर्थिक अनलाइन इकोनोमिक टाइम्सका अनुसार यसमध्ये करिब एक चौथाई रकम महिलाद्वारा सञ्चालित स्टार्टअपमा लगानी गरिने पिचाइको भनाइ छ ।
उनले हाल भारत प्राविधिक रुपान्तरणको महत्वपूर्ण समयबाट गुज्रिरहेको बताउँदै खुला इन्टरनेटमा जोड दिनुपर्ने धारणा समेत राखे । एएफपी ।

फेसबुकबाट तपाईको प्रतिक्रिया सबै