खैरो हेरोइन सहित मण्डल प्रहरीको नियन्त्रणमा

विराटनगर, १३ असोज । खैरो हेरोइन (ब्राउन सुगर) लागुऔषध सहित प्रदेश नम्वर १ को राजाधनी विराटनगरबाट एक वृद्धलाई प्रहरीले सोमवार साँझ पक्राउ गरेको छ ।
नेपाल प्रहरीको लागुऔषध नियन्त्रण ब्युरो टोलीले विराटनगर महा नगरपालिका–१६ दरैयाका ६१ वर्षीय रामु मण्डललाई हिजो साँझ खैरो हेरोइन सहित पक्राउ गरेको हो । विराटनगर महानगरपालिका वडा नम्वर १२ कलेज रोडबाट पक्राउ परेको मण्डलको साथबाट ५ ग्राम ७० मिलिग्राम ब्राउन सुगर फेला परेको मोरङ प्रहरीका प्रवक्ता डीएसपी मानबहादुर राईले जानकारी दिए ।
साइकलमा यात्रा गरिरहेका वृद्ध मण्डलले भारतबाट ब्राउन सुगर लिएर आएको हुन सक्ने आशंका प्रहरीको छ । उनले लगाएको टी–सर्टको अगाडीको गोजीमा सेतो प्लाष्टिक भित्र प्याक गरेर राखेको अवस्थामा ब्राउन सुगर बरामद भएको डीएसपी राईको भने । उनीविरुद्ध लागुऔषध मुद्दा चलाउन प्रहरीले प्रक्रिया अघि बढाएको छ ।