बसको ठक्करबाट सर्लाहीमा गढीमाईको एक युवकको मृत्यु, बालक सहित २ घाइते

तराई टप संवाददाता
सर्लाही, १८ वैशाख । सर्लाहीको गोडैता नगरपालिकामा यात्रुबाहक बसले मोटरसाइकललाई शनिवार विहान ठक्कर दिदा एक जनाको घटनास्थलमै मृत्यु भएको छ भने बालक सहित दुई जना गम्भीर घाईते भएका छन् ।
गोडैता नगरपालिका ५ रामवनको गडहियाबाट करकठवा तर्फ जादै गरेका ना ४ ख १०८९ नम्वरको यात्रु बाहक बसले अनटेष्ट मोटरसाइकललाई ठक्कर दिदा उक्त घटना भएका हुन् । दुर्घटनामा परेर गम्भीर घाईते भएका मोटरसाइकल चालक रौतहट गढीमाई नगरपालिका ८ का २६ बर्षिय जयचन्द्र साहको उपचारको लागि मलंगवा अस्पताल तर्फ लैजाने क्रममा बाटोमै मृत्यु भएको जिल्ला प्रहरी कार्यालय सर्लाहीले जनाएको छ ।
मोटरसाइकलमा सवार अन्य २ जना रौतहट गढीमाई नगरपालिका ८ का ३५ बर्षिय विगु साह र ९ बर्षिय विनेशकुमार साह गम्भीर घाईते हुँदा बरहथवा अस्पतालमा उपचार भईरहेको जिल्ला प्रहरी कार्यालय सर्लाहीका प्रहरी निरीक्षक कृष्ण गिरीले जानकारी दिदै ठक्कर दिने वस र चालकलाई नियन्त्रणमा लिई आवश्यक कारवाही सुरु गरिएको बताए ।