जयपुर । इन्डियन प्रिमियर लिग (आईपीएल) को ३८ औँ खेलमा राजस्थान रोयल्सले मुम्बई इन्डियन्सलाई एकतर्फी रुपमा डोमेनेट गर्दै ९ विकेटले पराजित गरे ।
टस जितेर ब्याटिंग रोजेका मुम्बईले ९ विकेटको क्षतिमा १७९ रन बनाएर १ सय ८० रनको लक्ष्यलाई राजस्थानले ८ बल बाँकी छँदै मात्र एक विकेटको क्षतिमा पछ्यायो ।
राजस्थलानलाई सहज दिलाउन युवा खेलाडी यशस्वी जयसवालले शतकीय इनिङ्स खेले । उनले ६० बलमा १ सय ४ रन बनाए । यसक्रममा उनले ९ चौका र ७ छक्का हिर्काए । उनलाई जोस बट्लरले ३५ रन तथा कप्तान सञ्जु स्यामसनले ३८ रनको महत्वपूर्ण साथ दिए । मुम्बईका लागि एक्लो विकेट पियुश चावलाले हात पारे ।
यसअघि सन्दीप शर्माले घातक बलिङ गर्दै ५ विकेट लिएपछि मुम्बई निर्धारित २० ओभरमा ९ विकेटको क्षतिमा १ सय ७९ रनमा समेटिएको थियो । शर्माले ४ ओभरमा मात्र १८ रन खर्चिएर ५ विकेट लिएका थिए ।
मुम्बईका लागि तिलक वर्माले सर्वाधिक ६५ रन बनाए । त्यस्तै नेहल वाधेराले ४९ रनको योगदान दिए भने मोहम्मद नाबीले २३ रन बनाए । ट्रेन्ट बोल्टले २ विकेट तथा अभेष खान र युजभेन्द्र चाहलले १–१ विकेट लिए ।
जितसँगै राजस्थान प्वाइन्ट तालिकामा शीर्ष स्थानमा उक्लेको छ । ८ खेलमा सातौँ जितसहित राजस्थानले १४ अंक मा पुग्न सफल भएको छ । उता, पाँचौँ पराजय बेहोरेको मुम्बई ६ अंकसहित सातौँ स्थानमा सीमित छ ।
