गौरको कोईरी टोलमा धारिलो हतियार प्रहार गरेर बृद्धको हत्या

रौतहट, ३० साउन । रौतहट सदरमुकाम गौर नगरपालिकाको कोइरी टोल स्थित धान खेतमा एक जना वृद्धको धारिलो हतियार प्रहार गरेर हत्या गरिएको अवस्थामा शव फेला परेको छ ।
गौर नगरपालिका वडा नम्वर ५ कोईरी टोल स्थित धान खेतमा सोही वडा निवासी ७४ बर्षिय अनिरुद्ध महतो कोइरीको धारिलो हतियार प्रहार गरेर हत्या गरिएको अवस्थामा स्थानीयहरुले बुधवार विहान देखेपछि प्रहरीलाई खवर गरेका थिए ।
प्रहरीले सूचना पाउना साथ रौतहट प्रहरीका एसपी दिलिप घिमिरे, डिएसपी एलिजा गिरी सहितका प्रहरी टोली घटना स्थलमा पगेर अनुसन्धान सुरु गरिएको जिल्ला प्रहरी कार्यालय रौतहटले जनाएको छ ।
झोलुङ्गे पुल देखि पश्चिम तर्फ धान खेतमा हत्या गरेर बेवारिसे अवस्थामा फेला परेको कोइरीको शव फेला परेपछि स्थानीय त्रसित बनेका छन् । आफनै खेतबारीमा तरकारी उत्पादन गरेर विक्री वितरण गर्दै आएका कोइरीको पेटमा धारिलो हतियारले प्रहार गरी फालिएको अवस्थामा फेला परेको प्रहरीले बताए ।
प्रहरीले हत्या भएको आशंका व्यक्त गर्दै आवश्यक अनुसन्धान गरिरहेका छांैं चाँडै अभियुक्तलाई नियन्त्रणमा लिने दाबी एसपी घिमिरेले गरे ।