विश्वा स्वास्थ्य संगठनले एमपक्सलाई लिएर सार्वजनिक स्वास्थ्य आपतकाल घोषणा

अफ्रिकी मुलुकमा फैलिएका एमपक्स रोगलाई लिएर विश्व स्वास्थ्य संगठन (डब्लुएचओ) ले विश्वव्यापी रुपमा सार्वजनिक स्वास्थ्य आपतकाल घोषणा गरेका छन् ।
अफ्रिकाका केही भागमा एमपक्स रोग फैलिएपछि विश्व स्वास्थ्य संगठन (डब्ल्यूएचओ) ले सार्वजनिक स्वास्थ्य आपत्काल घोषणा गरेर सावधानी गराएका हुन् ।
डब्ल्यूएचओले यो रोगलाई अन्तर्राष्ट्रिय चासोको विषयका रूपमा समेत व्याख्या गरेको छ । एमपक्स एक संक्रामक रोग हो । यसअघि मंकीपक्स भनेर चिनिन्थ्यो । अफ्रिकी मुलुक मध्ये पर्ने कंगोमा यो रोगबाट प्रारम्भिक चरणमा कम्तीमा ४५० जनाको मृत्यु भएको थियो ।
अहिले यो रोग मध्य र पूर्वी अफ्रिकामा तीव्र गतिमा फैलिरहेको छ । वैज्ञानिकले रोगको द्रुत रूपमा फैलिरहेको नयाँ प्रकार (भेरिएन्ट) र उच्च मृत्यु दरप्रति चिन्ता व्यक्त गरेका छन् । डब्ल्यूएचओका प्रमुख टेड्रोस अधानोम गेब्रेयससले अफ्रिका र त्यसभन्दा बाहिर यो रोग फैलने सम्भावना प्रति चिन्ता व्यक्त गरे हुन् ।
“अन्तर्राष्ट्रिय सहयोगले मात्र यो रोग रोक्न सकिन्छ र मानिसको जीवन बचाउन सकिन्छ,” उनले भने । एमपक्स व्यक्तिहरूबीचको नजिकको सम्पर्कबाट फैलिन सक्छ । शारीरिक सम्पर्क, स्पर्श, एकार्काको नजिक सास फेर्दा यो रोग सर्ने सम्भावना बढि हुन्छ ।
यो रोगका लक्षणमा अचानक ज्वरो आउने, टाउको, शरीर, घाँटी दुख्ने, घाँटी र बंगारा मुनि ग्रन्थी बढ्ने, अनुहार, हत्केला, खुट्टाको पैताला, गुप्तांग र शरीरका अरू भागमा सुरुमा पानीका फोका देखिने र पछि पाक्ने र पिप जम्ने समस्या देखिएको डब्ल्यूएचओले जनाएको छ ।
यो रोग लागेको एक सय जना मध्ये चार जनाको मृत्यु हुने गरेको बीबीसीले जनाएको रिपोर्टमा उल्लेख गरिएका छन् । एजेन्सी