काठमाडौं, २३ असार । सम्पत्ती शुद्धीकरण कसुरमा पक्राउ परेका युनुस अन्सारीलाई काठमाडौं जिल्ला अदालतले १५ लाख धरौटीमा रिहा गर्न आदेश दिएको छ ।
जिल्ला अदालत काठमाडौंका न्यायाधिश बलराम लम्सालको इजलासले अन्सारीलाई १५ धरौटीमा छाड्न आदेश दिएको हो । अन्सारी विरुद्ध प्रहरीले ९ करोड ९ लाख ५३ हजार ७०९ रुपैयाँ बिगो कायम गरेर मुद्दा दायर गरेका थिए ।
तर, धरौटी बुझाउन नसकेपछि उनलाई कारागार चलान गरिएको अदालतका सूचना अधिकारी दीपक श्रेष्ठले बताए । श्रेष्ठका अनुसार उनी केन्द्रीय कारागार जगन्नाथ देवल चलान भएका हुन् ।
नेशनल टेलिभिजनको अध्यक्ष रहेको बेला प्रत्यक्ष अप्रत्यक्ष रूपमा ११ करोड ६२ लाख रुपैयाँ खातामा जम्मा भएको तथा ११ करोड ३७ लाख रुपैयाँ भुक्तानी भएको देखिएपछि उनीविरुद्ध सम्पत्ति शुद्धीकरणको अनुसन्धान गरिएको थियो ।
२०७६ सालमा युनुस अन्सारी किन पक्राउ परेका थिए ?
अन्सारी जेठ १० गते नक्कली भारतीय रुपैया काण्डमा कैदसजाय भुक्तान गरेर ललितपुरको नख्खु कारागारबाट छुटे लगत्तै प्रहरीले सम्पत्ती शुद्धीकरण मुद्दामा पक्राउ गरेको थियो । अन्सारी पक्राउ परेपछि उनले सर्वोच्च अदालतमा बन्दी प्रत्यक्षीकरणको रिट निवेदन दर्ता गराएको थियो ।
युनुस अन्सारी सहित ६ जनालाई २०७६ साल जेठ १० गते त्रिभुवन अन्तरराष्ट्रिय विमानस्थलबाट ७ करोड ७६ लाख नक्कली भारतीय नोट सहित पक्राउ गरिएको थियो ।
कतारबाट काठमाडौं आउने तीन पाकिस्तानी नागरिक राहदानी नम्बर एए १२४५४९४– ४९ वर्षीय मोहम्मद अख्तर, एआर २४०६४३२– ६७ वर्षीय नासिर उद्दिन र राहदानी नम्वर सीएन १८१२०३२– ३९ वर्षीय नादिया अनवरलाई पक्राउ गरिएको थियो । उनीहरु कराँचीबाट कतार हुँदै नेपाल आएका थिए ।
तीन जना पाकिस्तानी नागरिकलाई रिसिभ गर्न त्रिभुवन अन्तरराष्ट्रिय विमान स्थलमा युनुस अन्सारी सँगै रौतहटको बैरिया–१ का सुबल खान र भक्तपुरको बालकोटका रानाभाटलाई समेत गरिएको थियो ।
उक्त घटनामा युनुस अन्सारीलाई दोषी ठहर गर्दै ६ वर्ष कैद ६० हजार रुपैयाँ जरिवाना र १३ सय रुपैयाँ क्षतिपूर्तिको सजाय भएको थियो ।