चन्द्रपुर (रौतहट), ६ भदौं । चन्द्रपुर नगरपालिका क्षेत्र भित्र घरधनीहरु आ–आफना घरको अभिलेख गराउन छुट भएकाहरुको लागि अन्तिम पटक अभिलेखिकरण गर्नका निमित्त एक महिनाको समय सिमा निर्धारण गरिएका छन् ।
चन्द्रपुर नगरपालिकाले अभिलेखिकरणमा छुट भएका पुराना घरधनीलाई अन्तिम पटक सूचना जारी गर्दै एक महिना भित्र आ आफना घरहरुको अभिलेखिकरण गराउन समय सिमा निर्धारण गरिएका सूचना सवैमा जारी गरेका हुन् ।
आर्थिक वर्ष २०७७÷०७८ को निर्देशिका अनुसार चालु आर्थिक बर्षको भदौ २ गते बसेको नगर कार्यपालिका बैठकले शतप्रतिशत जरिवाना असुल गरी छुट भएका घरहरूको अभिलेखिकरण गर्ने निर्णय नगरपालिकाको कार्यपालिकाको बैठकबाट गरिएको छ ।
नगरपालिकाले आफ्ना नागरिकलाई सुविधा दिन एक पटकका लागि मात्र अभिलेखिकरण खुला गरेको जनाएको छ । भवन आचारसंहिता अनुसार २०७४ सालअघि निर्माण भएका घरहरू अभिलेखिकरण गर्न संघीय सरकारको निर्देशिका अनुरुप बनेको कार्यविधीले पटक–पटक आहवान गरे पनि यसपटक अन्तिम मौका दिने गरी निर्णय गरिएको बताइएको छ ।
निर्धारित शुल्क अनुसार पुराना घर अभिलेखिकरण गर्न प्रति स्क्वायर ८ रुपैयाँ लाग्नेछ भने नयाँ नक्सा पासको लागि प्रति स्क्वायर ५ रुपैयाँ लाग्ने नगर प्रमुख सञ्जय काफ्लेले बताउदै कसैको उक्साहटमा नलागी तोकिएको समयमै अभिलेखिकरण गरी सुरक्षित बन्न सबैलाई आग्रह गरे ।
चन्द्रपुर क्षेत्रमा नक्सा पास नगरी घर निर्माण गर्नेको संख्या धेरै छ । प्रायः नागरिकले बैंकबाट ऋण लिनुपर्दा मात्रै नक्सा पास गर्ने प्रवृत्ति देखिएकोमा यसलाई निरुत्साहित गर्न जरुरी रहेको नगरप्रमुख काफ्लेले बताए ।
वडा नम्वर १ का अध्यक्ष बलराम राउतले आफ्ना नागरिकलाई अन्तिम पटक दिइएको अवसर गुमाउन नहुन आग्रह गरे । नयाँ घर निर्माण गर्दा सुरुदेखि नै मापदण्ड अनुसार बनाउनु पर्नेमा नागरिकले त्यस विपरित अटेर गरेर घर निर्माण गरेर अभिलेखिकरण गर्ने प्रबृतीले भवनसंहिता विपरित घर निर्माण हुने गरेको छ ।
नगरपालिकाले समयमै नक्सा पास गरेर घर बनाउनेलाई तुलनात्मक रुपमा कम शुल्क लाग्ने जानकारी समेत दिएको छ । तोकिएको समयसीमा भित्र अभिलेखिकरण नगर्ने घरधनीलाई आगामी दिनमा घरको अभिमुखिकरण नहुने नगरपालिकाले जानकारी दिए ।