वीरगंज, २८ माघ । आम जनता पार्टी (आजपा) का अध्यक्ष तथा पूर्वमन्त्री प्रभु साहले सत्ता जोगाउन युवामाथि गोली चलाउने र सत्ता प्राप्तिका लागि युवालाई उक्साउने दुवै प्रवृत्तिबाट देशलाई जोगाउनु पर्ने बताए ।
अजपा पर्साद्वारा बुधबार वीरगंजको छपकैयामा आयोजित चुनावी कार्यक्रमलाई सम्बोधन गर्दै साहले जेनजी आन्दोलनको प्रसंग उठाउँदै वर्तमान र पूर्व शासक नेतृत्वमाथि कडा टिप्पणी गरे ।
उनले सत्ता जोगाउन हिंसात्मक दमन गरिएको आरोप लगाउँदै, “जेनजी पुस्ताले सुशासन र भ्रष्टाचार विरुद्ध सचेत आन्दोलन गर्यो, तर सत्ता जोगाउन गोलीको वर्षा गरियो,” उनले भने ।
साथै उनले सत्ता प्राप्तिका लागि युवालाई प्रयोग गर्ने प्रवृत्तिमाथि पनि प्रश्न उठाए । “युवालाई बलिको बोको बनाएर सत्तारोहण गर्ने सोच पनि उत्तिकै खतरनाक छ,” उनले भने, “दुवै अतिवादी प्रवृत्तिलाई कानुनी दायरामा ल्याउनुपर्छ ।”
जाँचबुझ आयोगमाथि प्रश्न
भदौ २३ र २४ गतेको जेनजी आन्दोलनपछि घटनाको छानबिन गर्न गठन गरिएको जाँचबुझ आयोग माथि पनि साहले असन्तुष्टि व्यक्त गरे । उनले आयोगले समयमै प्रतिवेदन सार्वजनिक गर्न नसकेको भन्दै त्यसको औचित्यमाथि प्रश्न उठाए ।
“सरकारको आयु सकिन लाग्दा पनि आयोगले प्रतिवेदन बाहिर ल्याउन सकेको छैन, यो शहीदहरुको अपमान हो,” साहले भने ।
उनले आयोगले तत्कालीन सरकारका उच्च पदाधिकारी सँग कडा रूपमा बयान लिन नसकेको आरोप लगाउँदै छानबिन प्रक्रिया प्रभावकारी नभएको दाबी गरे । आयोगले प्रतिवेदन तयार भएको सार्वजनिक रूपमा बताइसके पछि पनि त्यसलाई सार्वजनिक नगर्नु शंकास्पद भएको उनको ठम्याई छ र
‘चुनाव जेनजी आन्दोलनको आलोकमा’
साहले आगामी निर्वाचन जेनजी आन्दोलनको पृष्ठभूमिमा हुन गइरहेको उल्लेख गर्दै जनताले सत्य तथ्य जान्न पाउने अधिकार रहेको बताए । उनले तत्काल प्रतिवेदन सार्वजनिक गर्न माग गर्दै भने, “जनता भदौ २३ र २४ को यथार्थ जान्न चाहन्छन् ।”
उनले यो निर्वाचनलाई “सत्यवादी र शक्तिवादी बीचको लडाइँ” को रूपमा चित्रण गर्दै अतिवादी, लोकप्रियतावादी र ‘नक्कली नायक’ हरू पराजित हुने दाबी गरे ।
“हामी संख्यामा होइन, सत्यमा विश्वास गर्छौं,” साहले भने, “गरिब, निमुखा र भुईँमान्छेको न्यायका लागि लड्ने शक्तिलाई नै जनताले साथ दिनेछन् ।”