कलैया, १६ फागुन । आम जनता पार्टीका अध्यक्ष प्रभु साहले विदेशीलाई नागरिकता दिने प्रावधान घोषणापत्रमा उल्लेख गर्ने दलहरूविरुद्ध कडा आपत्ति जनाए ।
विदेशीलाई नागरिकता दिने प्राबधान घोषणापत्रमा उल्लेख गर्ने दलले तत्काल माफी माग्न र निर्वाचन आयोगद्वारा त्यस्ता दल खारेज गर्नुपर्ने माग गरेका हुन् ।
बाराको सिम्रौनगढमा आयोजित चुनावी सभालाई सम्बोधन गर्दै आजपाका अध्यक्ष साहले २१ फागुनको निर्वाचनलाई लक्षित गर्दै केही दलले ल्याएको घोषणापत्रमा दोहोरो नागरिकताको पक्षमा उभिएको विषय राष्ट्रघाती कदम भएको आरोप लगाए ।
उनले विशेषगरी राष्ट्रिय स्वतन्त्र पार्टी (रास्वपा) को घोषणापत्रमा उल्लेख ‘एक पटकको नेपाली, सधैंको नेपाली’ अवधारणालाई लिएर आपत्ति जनाए । रास्वपाले गैरआवासीय नेपालीहरूको भावनात्मक सम्बन्धलाई कदर गर्दै सिद्धान्ततः दोहोरो नागरिकताको पक्षमा उभिने र सम्पत्तिसम्बन्धी प्रशासनिक झन्झट हटाउने उल्लेख गरे ।
त्यस्तै नेपाली कांग्रेस ले पनि ‘नेपाली डायस्पोराः अटुट सम्बन्ध, विस्तारित नेपाल’ शीर्षकमा नागरिकताको निरन्तरता, सम्पत्ति र मतदान अधिकार सुनिश्चित गर्ने प्रतिबद्धता जनाए ।
साहले यस्तो प्रावधान राष्ट्रको स्वाधीनता माथि आघात भएको दाबी गर्दै गम्भीर बहस आवश्यक रहेको बताए । “एक पटकको नेपाली सधैंका लागि नेपाली हुन्छ भने एक पटकको अमेरिकी सधैंका लागि अमेरिकी हुन्छ कि हुँदैन?” भन्दै उनले प्रश्न उठाए ।
उनले नेपालको भूमि आदिवासी–जनजातिको भूमि भएको उल्लेख गर्दै जातीय विभाजनको राजनीति नगर्न आग्रह गरे । साथै, अवैध रूपमा नेपाली सम्पत्ति विदेश लैजाने प्रवृत्ति रोक्नुपर्ने, कर प्रणालीमा सुधार गरी भ्रष्टाचार अन्त्य गर्नुपर्ने र अर्थतन्त्र सुदृढ बनाउने प्रतिबद्धता व्यक्त गरे ।
साहले वर्तमान संघीय संरचनामा ७६१ वटा सरकार रहेको उल्लेख गर्दै संघीयताको मूल मर्म कमजोर बनाइएको टिप्पणी गरे । उनले दलतन्त्रको अन्त्य गरी जनतालाई देशको वास्तविक मालिक बनाउने उदघोष पनि गरे ।
नेता साहले ‘मौलापुर विकास मोडेल’ देशव्यापी रूपमा लागू गर्ने घोषणा गर्दै आफू प्रधानमन्त्री भए विद्युत्, सञ्चार सेवा (मोबाइल र डाटा) तथा खानेपानी निःशुल्क उपलब्ध गराउने दाबी गरे ।