रौतहट, ८ वैशाख । रौतहटको पूर्वी उत्तरी भेग स्थित वृन्दावन नगरपालिका विरुद्ध एक जना ठेकेदारले आफूलाई योजनाबद्ध रूपमा फसाउन खोजिएको गम्भीर आरोप लगाए ।
वडा नम्बर ८ बहुअरी स्थित श्री नमुना माध्यमिक विद्यालय बरगजवा परिसर भित्र रहेको करिब ४ बिघा ४ कठ्ठा क्षेत्रफलको पोखरी ठेक्कामा लिएका परीक्षण सहनी (राजकुमार सहनी) ले सम्झौता अनुसार काम गर्न नदिइएको गुनासो गरेको हो ।
पिडित सहनिका अनुसार उक्त पोखरी २०७८ जेठ ३ गते तत्कालीन जनप्रतिनिधिको कार्यकालमा डाक बढाबढ प्रक्रिया मार्फत पाँच वर्षका लागि ५६ लाख रुपैयाँमा ठेक्का लगाइएको थियो । उनले पहिलो किस्ता बापत ११ लाख ३० हजार रुपैयाँ बुझाएर माछापालन सुरु गरेका थिए । तर २०७९ को स्थानीय तह निर्वाचनपछि नयाँ नेतृत्व आएसँगै पोखरी व्यवस्थापनमा चरम लापरवाही भएको उनको आरोप छ ।
पोखरीमा पानीको उचित व्यवस्था नगरिदा व्यवसाय नै धरापमा परेको छ । “पानी नै नभएको पोखरीमा कसरी माछा पाल्ने?” भन्दै उनले पटक–पटक नगरपालिकामा पोखरी छोड्न निवेदन दिए पनि दर्ता नगरेको गुनासो गरे ।
सहनिले थप आरोप लगाउँदै २०८० चैत २८ गते पानी घटेपछि माछा निकाल्ने क्रममा वडा अध्यक्षको अगुवाइमा बलपूर्वक माछा बिक्री गरिएको तर त्यसको रकम आफूहरूले नपाएको बताए ।
यति मात्रै नभई, नगरपालिकाले उल्टै ठेकेदारविरुद्ध अदालतमा मुद्दा दायर गर्नुका साथै अख्तियार दुरुपयोग अनुसन्धान आयोगमा समेत उजुरी दिएको उनले बताए ।
“पहिलो किस्ताको रकम समेत उठाउन सकेका छैनौं, उल्टै बाँकी ४५ लाख तिर्नुपर्ने भन्दै मुद्दा हालिएको छ,” अब हाम्रो उठिवास बनाउनमा स्थानीय सरकार लागि परेको दुखेसो पोखे ।
मंगलबार पोखरीकै डिलमा आयोजित पत्रकार सम्मेलनमा पीडित पक्षले आफूहरूले बुझाएको रकम फिर्ता गराउन र न्याय दिलाउन माग गरे । कार्यक्रममा स्थानीयवासीहरूले समेत नगरपालिकाले ठेकेदारलाई अन्याय पूर्वक फसाउन खोजेको आरोप लगाए ।
यस विषयमा पूर्व वडा अध्यक्ष दिनानाथ महतोले पनि पानी अभावका कारण पोखरी सञ्चालन असम्भव जस्तै भएको स्वीकार गरे । उनका अनुसार पछिल्लो तीन वर्षदेखि पोखरी पूर्ण रूपमा सुक्खा रहेको छ । “यस्तो अवस्थामा ठेकेदारले कसरी व्यवसाय सञ्चालन गर्ने र राजस्व तिर्ने ?” उनले प्रश्न उठाए ।
उनले अदालत र सम्बन्धित निकायलाई स्थलगत अनुगमन गर्न आग्रह गर्दै वास्तविकता बाहिर आएपछि मात्र न्याय हुने दाबी गरेका छन् ।