कटहरियामा पूर्व वडा सदस्यमाथि सामूहिक अत्याचार, प्रहरीमाथि समेत आक्रमणको प्रयास
रौतहट, २० वैशाख । रौतहटको कटहरिया नगरपालिकामा बोक्सीको आरोप लगाउँदै एक दलित महिलालाई मानव मल–मूत्र खुवाएर अमानवीय तथा जघन्य अपराध गरेको घटना सार्वजनिक भएको छ ।
कटहरिया–९ की ५५ वर्षीया पूर्व वडा सदस्य अंकलिया देवी मुसहरिनलाई स्थानीय केही व्यक्तिहरूले बलपूर्वक मानव मल–मूत्र खुवाएको घटनाले समाज सिंगो समाज स्तब्ध बनेको हो ।
घटनाअनुसार छिमेकी पुकार माझीको घरमा बिहेको अवसरमा पर्साबाट आएको जन्ती मध्ये एक १० वर्षीय बालकले उल्टी गरेपछि त्यसैलाई निहुँ बनाउँदै अंकलिया देवी माथि जादू–टुना गरेको आरोप लगाएर उक्त दुष्कार्य गरियो ।
हिजो शनिबार साँझ करिब ७ बजेतिर १५–२० जनाको समूह एक्कासी अकलियाको घरभित्र पसेर उनीमाथि कुटपिट गर्दै बियरको बोतलमा घोलेको मल–मूत्र जबर्जस्ती खुवाएको पीडिताकी छोरी सुमिला देवी मुसहरिनले बताइन् ।
छोरी सुमिलाका अनुसार घटनाका बेला उनीहरू आमा–छोरी मात्रै घरमा थिए । विरोध गर्दा आफूमाथि समेत कुटपिट भएको उनले दुःखेसो पोखिन् । घटनामा पुकार माझी, राजेन्द्र माझी, लक्ष्मी माझी, शंकर माझी, सुरेन्द्र ठाकुर, गौरी साह लगायत एक दर्जनभन्दा बढीको संलग्नता रहेको पीडिताले गम्भीर आरोप लगाइन ।
घटनापछि इलाका प्रहरी कार्यालय कटहरियाका प्रहरी नायव निरीक्षक मोहन आले मगरको नेतृत्वमा गएको प्रहरी टोलीले अचेत अवस्थामा रहेकी महिलाको उद्धार गरेर प्राथमिक स्वास्थ्य केन्द्रमा उपचारका लागि पठाएका थिए । उपचारपछि उनको अवस्था सामान्य रहेको प्रहरीले जनाए ।
तर, घटनालगत्तै आरोपीहरू पक्राउ गर्न पुगेको प्रहरी टोली माथि आरोपित पक्षद्वारा अवरोध खडा गर्नुका साथै आक्रमणको प्रयास समेत गरेको प्रहरीले जनाए । स्थिति तनावपूर्ण बनेपछि थप सुरक्षा सतर्कता अपनाइएको थियो ।
इलाका प्रहरी कार्यालय गरुडाका डीएसपी शंकर प्रसाद आचार्यले उक्त घटनाको अनुसन्धान गरिरहेको तथा दोषीहरूलाई कानुन अनुसार कडा कारबाही गरिने चेतावनी दिए । आरोपीहरूको खोजी गर्न थप प्रहरी परिचालन गरिएको उनले बताए ।
स्थानीय मुसहर समुदायमा बिहेपछि बेहुली पक्षबाट भोलिपल्ट ‘सरियतिया’ जाने चलन रहेको र सो अवसरमा भोज भतेर गर्ने परम्परा रहँदै आएको छ । तर, यही सामाजिक परिवेशबीच घटेको यस प्रकारको क्रूर घटनाले अन्धविश्वास र सामाजिक विकृतिको भयावह रूपलाई उजागर गरेको छ ।