रौतहट, १० असार । गौर नगरपालिकाले आगामी आर्थिक वर्ष २०८३÷०८४ का लागि नागरिक मैत्री नीति तथा कार्यक्रम सार्वजनिक गर्दै नगरवासीलाई प्रत्यक्ष लाभ पुग्ने विभिन्न योजना अघि सारेको छ ।
बुधबार गौर नगर कार्यपालिकाको कार्यालय परिसरमा आयोजित १८ औँ नगरसभामा नगरप्रमुख शम्भु साहले नीति तथा कार्यक्रम प्रस्तुत गर्दै नगरवासीका आधारभूत आवश्यकतालाई सम्बोधन गर्दै आत्मनिर्भरता प्रवद्र्धन गर्ने कार्यक्रमलाई प्राथमिकतामा राखिएको नीति लिएको बताए ।
प्रस्तुत नीति तथा कार्यक्रम अनुसार नगरपालिकाले ५० युनिटसम्मको विद्युत् महसुल व्यहोर्ने व्यवस्था गर्ने घोषणा गरे । त्यस्तै, विभिन्न सीप हासिल गरे पनि औपचारिक प्रमाणपत्र नपाएका युवालाई सीप परीक्षणमा सहभागी गराई प्रमाणिकरण तथा रोजगारीमा जोड्ने कार्यक्रम सञ्चालन गरिनेछ ।
नगरप्रमुख साहले निर्माणाधीन टाउन हल आगामी आर्थिक वर्षभित्र सम्पन्न गरी त्यसलाई ‘सहिद शिवप्रसाद सिंह टाउन हल’ नामकरण गर्ने घोषणा गर्नुभयो । वडा नम्बर २ मा निर्माणाधीन विवाह भवनलाई ‘बानेश्वरनाथ विवाह भवन’ तथा वडा नम्बर ४ मा निर्माणाधीन विवाह भवनलाई ‘सहिद हरदयाल महतो विवाह भवन’ नामकरण गरिने नीति पनि सार्वजनिक गरे ।
नगरलाई धुवा मुक्त बनाउने अभियानमा चुल्हो सहितको ग्यास सिलिण्डर विपन्नलाई उपलब्ध गराउने, पंडित मंगलकुमार उपाध्याय राजर्सी क्याम्पसका लागि वडा नम्वर ८ मा जग्गा सुनिश्चिता भईसकेको हुँदा अगामी आर्थिक बर्षमा निर्माणको कार्य अघि बढाएपछि उच्च शिक्षा हासिल गर्न नगरवासीलाई टेवा पुग्ने विश्वास व्यक्त गरे ।
पर्यटन क्षेत्रको विस्तारको लागि बानेश्वर स्थान नजिकै झुलुंगे पुल नजिक पर्यटनका पूर्वाधारहरुलाई विकास गरिनेछ, बरहवा ताललाई व्यवस्थित गरिने छ ।
नीति तथा कार्यक्रममा सुशासन तथा संस्थागत विकास, राजस्व व्यवस्थापन, सूचना प्रविधि, वित्तीय अनुशासन, सहरी विकास, पूर्वाधार निर्माण, कृषि, पशुपालन, सिँचाइ, उद्योग, सहकारी, वन तथा वातावरण संरक्षण, विपद् व्यवस्थापन, शिक्षा, युवा तथा खेलकुद, रोजगार, संस्कृति तथा पर्यटन प्रवद्र्धन, महिला, बालबालिका, जेष्ठ नागरिक, अपाङ्गता भएका व्यक्ति, सामाजिक सुरक्षा, स्वास्थ्य, खानेपानी, सरसफाइ तथा कानुन–न्याय क्षेत्रलाई समेटिएको घोषणा गरे ।
यसैबीच आगामी आर्थिक वर्षका लागि ५३ करोड ८८ लाख १२ हजार रुपैयाँको अनुमानित बजेट प्रस्तुत गरिएको छ । उपप्रमुख शैलकुमारी शाहको तर्फबाट नगर प्रवक्ता तथा वडा नम्बर ९ का वडाध्यक्ष अर्जुन सिंहले बजेट प्रस्तुत गर्दै चालु आर्थिक वर्षको तुलनामा करिब ११ करोड १० लाख २२ हजार रुपैयाँले बजेट घटेको जानकारी दिए ।
उलने पाँच बर्षिय कार्यकालको अन्तिम बजेट रहेको हुँदा हामीले धेरै योजनाहरुलाई पुरा गर्न नसकेपनि जनताहरुको हृदय जित्न सफल भएको हुँदा पुनः आएर उक्त अधुरा कार्यहरु पुरा गर्ने वाचा गरे ।
१८औँ नगरसभामा मधेश प्रदेशका उद्योग, वाणिज्य तथा पर्यटन मन्त्री कनिष पटेल प्रमुख अतिथिका रूपमा सहभागी हुनुहुन्थ्यो । कार्यक्रमको स्वागत मन्तव्य प्रमुख प्रशासकीय अधिकृत विष्णु पौडेलले व्यक्त गरेको थियो ।



बजार व्यवसायलाई चलायमान बनाउन गौरमा मंसिर ६ देखि ‘रौतहट एक्सपो २०८३’, लण्डन ब्रिज र जलपरी मुख्य आकर्षण
गौर आँखा अस्पतालद्वारा मौलापुरमा निःशुल्क आँखा शिविर, ३२६ जनाको परीक्षण, ७६ जना शल्यक्रियाको लागि छनौंट
उमेर हद खारेजीको माग गर्दै विगत १८ दिन देखि आन्दोलनरत वागमती सिंचाई आयोजनाका कर्मचारी प्रति राज्य उदाशिन