धनुषा, १४ साउन । मधेश प्रदेशमा पछिल्लो समयमा घटिरहेको घटनाक्रमका कारण उत्पन्न असहज परिस्थितिलाई मध्यनजर गर्दै मधेश प्रदेश सरकारले नागरिकलाई धैर्यता, संयम र जिम्मेवारी प्रदर्शन गर्न आग्रह गरेको छ ।
गृह, सञ्चार तथा कानुन मन्त्री फकिरा महतोले जारी गरेको सार्वजनिक अपिल मार्फत प्रदेशमा शान्ति, सामाजिक सद्भाव र आपसी विश्वासलाई कायम राख्नु अहिलेको प्रमुख आवश्यकता भएको उल्लेख गरेको हो ।
मन्त्री महतोले मधेश प्रदेश बहुधार्मिक, बहुभाषिक र बहुसांस्कृतिक विशेषता बोकेको प्रदेश भएको हुनाले कुनै पनि घटनालाई साम्प्रदायिक वा धार्मिक विवादका रूपमा प्रस्तुत गर्ने वा समाजमा विभाजन ल्याउने प्रयासले प्रदेशको सामाजिक एकतामाथि नकारात्मक असर पार्ने बताए ।
उनले तथ्यहीन सूचना, अफवाह तथा उत्तेजक सामग्रीको प्रचार–प्रसार नगर्न र त्यस्ता गतिविधि प्रति सचेत रहन सबैलाई आग्रह गरे ।
उनका अनुसार प्रदेश सरकार नागरिकको सुरक्षा, सार्वजनिक शान्ति तथा कानूनको शासन कायम गर्न पूर्ण रूपमा सक्रिय रहेको छ । वर्तमान अवस्थालाई ध्यानमा राखी सुरक्षा निकायसँग आवश्यक समन्वय र परिचालन भइरहेको तथा परिस्थितिको निरन्तर समीक्षा गरिरहेको पनि अपिलमा उल्लेख गरिएको छ ।
मन्त्री महतोले हिंसा, आगजनी, तोडफोड, घृणा फैलाउने अभिव्यक्ति तथा सार्वजनिक शान्ति खलबल्याउने कुनै पनि गतिविधि कानून विपरीत रहेको स्पष्ट गर्दै यस्ता कार्यमा संलग्न जो–कोही माथि कानुनी कारबाही गरिने चेतावनी दिए ।
साथै उनले धार्मिक अगुवा, जनप्रतिनिधि, राजनीतिक दल, सञ्चार माध्यम, नागरिकसमाज, शिक्षक, विद्यार्थी, युवा तथा सम्पूर्ण प्रदेशवासीलाई सामाजिक सद्भाव र सह अस्तित्वको वातावरण जोगाउन आ–आफ्नो स्थानबाट सकारात्मक भूमिका खेल्न आग्रह गरे ।
सामाजिक सञ्जालमा आउने अपुष्ट सूचनाको पछि नलाग्न र आधिकारिक निकायबाट प्राप्त सूचनालाई मात्र विश्वास गर्न पनि उनले अनुरोध गरे । मन्त्री महतोले शान्ति, सहिष्णुता, आपसी सम्मान र सामाजिक एकता नै मधेश प्रदेशको पहिचान र बल भएको उल्लेख गर्दै सबै नागरिकले जिम्मेवारीपूर्ण व्यवहार गरेमा वर्तमान चुनौतीलाई सहज रूपमा सामना गर्न सकिने विश्वास व्यक्त गरे ।
उनले प्रदेशमा शान्तिपूर्ण वातावरण कायम राख्न सरकार सबै पक्षसँग सहकार्य गर्न प्रतिबद्ध रहेको समेत बताए ।
बजार व्यवसायलाई चलायमान बनाउन गौरमा मंसिर ६ देखि ‘रौतहट एक्सपो २०८३’, लण्डन ब्रिज र जलपरी मुख्य आकर्षण
गौर आँखा अस्पतालद्वारा मौलापुरमा निःशुल्क आँखा शिविर, ३२६ जनाको परीक्षण, ७६ जना शल्यक्रियाको लागि छनौंट
उमेर हद खारेजीको माग गर्दै विगत १८ दिन देखि आन्दोलनरत वागमती सिंचाई आयोजनाका कर्मचारी प्रति राज्य उदाशिन