रौतहट, २६ साउन । रौतहटमा जिप चालकलाई बाटोमै रोकेर अपहरण शैलीमा घरमा लगिएको र त्यहाँ मरणासन्न हुने गरी कुटपिट गरिएको घटना सार्वजनिक भएको छ ।
घटनामा संलग्न रहेको आरोपमा प्रहरीले एक जनालाई नियन्त्रणमा लिएको छ भने अर्का आरोपीको खोजी तीव्र बनाएको हो ।
सोमबार राति करिब पौने ९ बजेको समयमा गौरबाट दुर्गा भगवती गाउँपालिका तर्फ जाँदै गरेको बीआर ०६ पीई २१२१ नम्बरको जिपलाई राजदेवी नगरपालिका–२ हजमिनिया गाउँमा जबर्जस्ती रोक्न लगाइएको थियो ।
जिप चालक दुर्गा भगवती गाउँपालिका–३ का २५ वर्षीय अरविन्द पण्डित पाहुना लिएर गन्तव्यतर्फ जाँदै गर्दा गौर नगरपालिका–९ का साहेब सिंह भन्ने राजवंश सिंह र उनका छोरा आयुष सिंहले गाडी रोक्न दबाब दिएका थिए ।
उनीहरुले गाडी नरोके पेट्रोल छर्केर आगो लगाइदिने धम्की दिएपछि पाहुना सवार चालक पण्डितले गाडी रोकेका थिए । त्यसपछि बाबुछोराले उनलाई जबर्जस्ती नियन्त्रणमा लिएर गौर नगरपालिका–९ सिर्सिया स्थित आफ्नै घरमा लगेको आरोप छ ।
घरमा पुर्याएपछि चालक पण्डित बाँधेर अम्बाको लौरोले हरणासन्न हुनेगरी कुटपिट गरिएको र उनी गम्भीर अवस्थामा पुगेको पीडित पक्षले जनाए । कुटाईको अवस्था हेरेर स्थानीयवासीले प्रहरीलाई खबर गरेपछि प्रहरी टोली घटनास्थलमा पुगेको थियो ।
प्रहरीले तत्कालै उद्धार गरेर पण्डितलाई उपचारका लागि प्रादेशिक अस्पताल गौरमा भर्ना गराएर ज्यान जोगाउन सफल भए । घटनामा संलग्न रहेको आरोपमा आज विहान प्रहरीले राजवंश सिंहलाई नियन्त्रणमा लिएको छ भने निजको आयुषको खोजी भइरहेको जिल्ला प्रहरी कार्यालय रौतहट स्रोतबाट बुझिएको छ ।
प्रारम्भिक विवरणअनुसार गौर–गंगापिपरा सडकखण्ड अन्तर्गत सिर्सिया क्षेत्रमा सडकमा रहेको कुकुर जिपले किचेर मारेको विषयलाई लिएर चालकलाई निशाना बनाइएको आरोप छ ।
सोही विषयलाई लिएर अर्को पालिकामा पुगेर चालकलाई नियन्त्रणमा लिई कुटपिट गरिएको भन्दै पीडित पक्षले घटनामा संलग्न व्यक्तिमाथि कडा कानुनी कारबाही गर्न प्रहरी प्रशासनसँग माग गरे ।
प्रहरीले घटना सम्बन्धमा आवश्यक अनुसन्धान गरिरहेको समेत बुझिएको छ ।
बजार व्यवसायलाई चलायमान बनाउन गौरमा मंसिर ६ देखि ‘रौतहट एक्सपो २०८३’, लण्डन ब्रिज र जलपरी मुख्य आकर्षण
गौर आँखा अस्पतालद्वारा मौलापुरमा निःशुल्क आँखा शिविर, ३२६ जनाको परीक्षण, ७६ जना शल्यक्रियाको लागि छनौंट
उमेर हद खारेजीको माग गर्दै विगत १८ दिन देखि आन्दोलनरत वागमती सिंचाई आयोजनाका कर्मचारी प्रति राज्य उदाशिन