रौतहट, २ भदौ । रौतहटमा पछिल्लो समय भाइरल ज्वरोका बिरामीको संख्या बढ्दै गएको छ ।
उच्च ज्वरोसहित सिकिस्त भएका बिरामीहरू उपचारका लागि प्रादेशिक अस्पताल गौरमा दैनिक ठूलो संख्यामा पुग्न थालेको हो ।
प्रादेशिक अस्पताल गौरका जनस्वास्थ्य निरीक्षक पंकज ठाकुरका अनुसार अस्पतालमा दैनिक एक सय भन्दा बढी उच्च ज्वरोका बिरामी उपचारका लागि आउने गरेका छन् । विशेषगरी बालबालिका र वृद्धवृद्धामा यसको प्रभाव बढी देखिए पनि सबै उमेर समूहका मानिस भाइरल ज्वरोबाट प्रभावित भएको उनले बताए ।
जनस्वास्थ्य निरीक्षक ठाकुरले प्रायः बिरामीहरुमा १०१ देखि १०३ डिग्री फरेनहाइट वा सोभन्दा बढी ज्वरो देखिने गरेको छ । सामान्यतः भाइरल ज्वरोको असर ४८ देखि ७२ घण्टासम्म देखिन सक्ने भएकाले उच्च ज्वरो आएमा लापरबाही नगरी समयमै स्वास्थ्य संस्थामा पुगेर चिकित्सकको निगरानीमा उपचार गराउन ठाकुरले सुझाव दिए ।
अस्पतालमा आउने बिरामीलाई आवश्यक परीक्षण तथा चिकित्सकीय निगरानीमा राखेर उपचार गरिदै आएको र उपचारपछि अधिकांश बिरामी निको भएर घर फर्किने गरेको उनले जानकारी दिए ।
स्वास्थ्यकर्मीहरूले भाइरल ज्वरोबाट बच्न अत्यधिक घाम र गर्मीबाट जोगिन, पर्याप्त आराम गर्न, स्वच्छ तथा सुरक्षित खानेपानी र खानाको प्रयोग गर्न तथा अत्यधिक चिसो पदार्थको सेवन कम गर्न सुझाव समेत दिए । साथै, ज्वरो आएमा आफूखुसी औषधि सेवन नगरी स्वास्थ्यकर्मीको सल्लाह लिन आग्रह गरिएको छ ।
प्रादेशिक अस्पताल गौरमा उपचारका लागि आउने बिरामीको संख्या मात्रै दैनिक सयभन्दा बढी रहेको बताइएको छ । जिल्लाका अन्य सरकारी तथा निजी अस्पताल र स्वास्थ्य संस्थामा समेत भाइरल ज्वरोका बिरामी उपचारका लागि पुगिरहेको जनाइएको छ । यसले जिल्लामा भाइरल ज्वरोको संक्रमण बढ्दो क्रममा रहेको संकेत गरेको छ ।
सुरुमा यसका लक्षणहरुमा ज्वरो, टाउको दुख्ने, शरीर दुख्ने, रुघा लाग्ने, कमजोरी लगायतका लक्षण देखिएमा समयमै स्वास्थ्य संस्था पुग्न र परिवारका अन्य सदस्यमा संक्रमण फैलिन नदिन व्यक्तिगत सरसफाइ तथा सावधानी अपनाउन स्वास्थ्यकर्मी ठाकुरले आग्रह गरे ।
बजार व्यवसायलाई चलायमान बनाउन गौरमा मंसिर ६ देखि ‘रौतहट एक्सपो २०८३’, लण्डन ब्रिज र जलपरी मुख्य आकर्षण
गौर आँखा अस्पतालद्वारा मौलापुरमा निःशुल्क आँखा शिविर, ३२६ जनाको परीक्षण, ७६ जना शल्यक्रियाको लागि छनौंट
उमेर हद खारेजीको माग गर्दै विगत १८ दिन देखि आन्दोलनरत वागमती सिंचाई आयोजनाका कर्मचारी प्रति राज्य उदाशिन