बारा, १७ भदौं । बाराबाट अपहरण भएका ११ बर्षीय बालकको भारतको बिहारस्थित सिंहदा नदी किनारमा मृत अवस्थामा शव फेला परेको छ ।
विश्रामपुर गाउँपालिका–३ मुसहर्वाका ११ वर्षीय बालक राजेशकुमार साहको हत्या भएको पुष्टि भएको हो ।
प्रहरी अनुसन्धानबाट बालकलाई अपहरण गरी सीमापार भारत लगेर हत्या गरिएको खुलेको छ ।
राजेशकुमारलाई गत भदौं ९ गते बिहान ९ बजका समयदेखि हराएका थिए । परिवारले बालक हराएको भन्दै प्रहरी चौकी मुसहर्वामा निवेदन दिएपछि प्रहरीले खोजी सुरु गरेको थियो । खोजीका क्रममा उनी हराएको दुई दिनपछि अर्थात् ११ गते भारतको बिहार, मोतिहारी जिल्ला, नुनियाडी पञ्चायत–१ स्थित सिंहदा नदीको किनारमा मृत अवस्थामा फेला परेका थिए।
घटना शंकास्पद देखिएपछि प्रहरीले अनुसन्धानलाई तीव्रता दिएको थियो । सीसीटीभी फुटेज तथा भारतीय प्रहरीसँगको समन्वयमा गरिएको अनुसन्धानबाट बालकलाई विश्रामपुरबाट अपहरण गरी भारत लगेर हत्या गरिएको तथ्य खुलेको प्रहरीले जनाए ।
प्रहरीका अनुसार घटना लुकाउने उद्देश्यले बालकलाई सीमापार भारत लगेर हत्या गरिएको देखिएको छ । घटनामा संलग्न रहेको आरोपमा १७ वर्षीय एक किशोरलाई प्रहरीले पक्राउ गरेको छ ।
पक्राउ परेका किशोरविरुद्ध अपहरण तथा कर्तव्य ज्यान कसुरमा बारा जिल्ला अदालतबाट पाँच दिनको म्याद लिएर थप अनुसन्धान अघि बढाइएको जिल्ला प्रहरी कार्यालय बाराका प्रवक्ता एवं डिएसपी मिन घलेले जानकारी दिए । घटनामा संलग्न अन्य व्यक्तिहरुको संलग्नता भए–नभएको विषयमा अनुसन्धान जारी रहेको जनाए ।
बजार व्यवसायलाई चलायमान बनाउन गौरमा मंसिर ६ देखि ‘रौतहट एक्सपो २०८३’, लण्डन ब्रिज र जलपरी मुख्य आकर्षण
गौर आँखा अस्पतालद्वारा मौलापुरमा निःशुल्क आँखा शिविर, ३२६ जनाको परीक्षण, ७६ जना शल्यक्रियाको लागि छनौंट
उमेर हद खारेजीको माग गर्दै विगत १८ दिन देखि आन्दोलनरत वागमती सिंचाई आयोजनाका कर्मचारी प्रति राज्य उदाशिन