रौतहट, २५ भदौ । जिल्ला प्रशासन कार्यालय रौतहटको नेतृत्व सम्हालेका प्रमुख जिल्ला अधिकारी लक्ष्मीप्रसाद पौडेलले जिल्लामा सुशासन, पारदर्शी सेवा प्रवाह तथा भ्रष्टाचार नियन्त्रणका सवालमा कुनै पनि सम्झौता नगर्ने प्रतिबद्धता व्यक्त गरे ।
जिल्ला प्रशासन कार्यालय रौतहटले बिहीबार सदरमुकाम गौरमा आयोजना गरेको सञ्चारकर्मीसँगको परिचयात्मक एवं अन्तरक्रिया कार्यक्रममा बोल्दै प्रमुख जिल्ला अधिकारी पौडेलले जनतालाई सहज, छिटो र पारदर्शी ढंगले सेवा उपलब्ध गराउनु आफ्नो प्रमुख प्राथमिकता रहेको बताए ।
निजामती सेवामा प्रवेश गरेदेखि नै आफूले सुशासन र पारदर्शितालाई प्राथमिकतामा राख्दै काम गर्दै आएको उल्लेख गर्दै उनले रौतहटमा पनि सोही कार्यशैलीलाई निरन्तरता दिने बताए । कार्यालयबाट प्रदान गरिने सेवामा अनावश्यक ढिलासुस्ती, बिचौलियाको प्रभाव तथा सेवाग्राहीलाई दुःख दिने प्रवृत्तिलाई निरुत्साहित गरिने उनको भनाइ थियो ।
“सुशासन, पारदर्शिता र भ्रष्टाचार नियन्त्रणका विषयमा कुनै सम्झौता हुँदैन,” पौडेलले भने, “कानुनको पालना र नागरिकलाई प्रभावकारी सेवा दिनु प्रशासनको मुख्य दायित्व हो ।”
उनले जिल्लामा शान्ति–सुरक्षा कायम गर्नुका साथै अपराधिक गतिविधि नियन्त्रणमा पनि प्रशासनले कडाइका साथ काम गर्ने बताए । अपराध तथा गैरकानुनी गतिविधिमा संलग्न जोसुकै भए पनि कानुन अनुसार कारबाहीको दायरामा ल्याएर छाड्ने ।
कार्यक्रममा सहभागी सञ्चारकर्मीहरूले जिल्लाको शान्ति–सुरक्षा, सेवा प्रवाह, भ्रष्टाचार नियन्त्रण, विकास निर्माण तथा नागरिकका समस्या लगायतका विषयमा प्रशासनको ध्यानाकर्षण गराएका थिए ।
प्रमुख जिल्ला अधिकारी पौडेलले प्रशासन र सञ्चार क्षेत्रबीचको सहकार्यलाई थप प्रभावकारी बनाउँदै जिल्लाका वास्तविक समस्या तथा नागरिकका गुनासालाई सम्बोधन गर्न आफू सकारात्मक रहेको बताए । उनले प्रशासनका कामकारबाहीलाई पारदर्शी बनाउन सञ्चारमाध्यमको रचनात्मक सहयोगको आवश्यक्ता महसुस गरे ।

बजार व्यवसायलाई चलायमान बनाउन गौरमा मंसिर ६ देखि ‘रौतहट एक्सपो २०८३’, लण्डन ब्रिज र जलपरी मुख्य आकर्षण
गौर आँखा अस्पतालद्वारा मौलापुरमा निःशुल्क आँखा शिविर, ३२६ जनाको परीक्षण, ७६ जना शल्यक्रियाको लागि छनौंट
उमेर हद खारेजीको माग गर्दै विगत १८ दिन देखि आन्दोलनरत वागमती सिंचाई आयोजनाका कर्मचारी प्रति राज्य उदाशिन