सर्लाही, ३१ भदौं । सर्लाहीको नवलपुर–मलंगवा सडकखण्डमा पर्ने कविलासी नगरपालिका–७, गैर सिर्सियामा मंगलबार साँझ मोटरसाइकल एक आपसमा ठोक्किदा दुई युवकको मृत्यु भएको छ भने दुई जना गम्भीर घाइते भएका छन् ।
हिजो साँझ पौने ६ बजेको समयमा कविलासीबाट गैरतर्फ जाँदै गरेको मधेश प्रदेश ०३–०३३ प ७८२४ नम्बरको मोटरसाइकल र विपरीत दिशाबाट आउँदै गरेको बीआर ३० एपी १२२४ नम्बरको मोटरसाइकल एक आपसमा ठोक्किएर उक्त दुखद घटना भएका हुन् ।
दुर्घटनामा परेर मधेश प्रदेश ०३–०३३ प ७८२४ नम्बरको मोटरसाइकल चालक गोडैता नगरपालिका–६ का ३० वर्षीय सुमित यादव र बीआर ३० एपी १२२४ नम्बरको मोटरसाइकल चालक कविलासी नगरपालिका–८ का २६ वर्षीय पप्पु पासवानको मृत्यु भएको जिल्ला प्रहरी कार्यालय सर्लाहीले जनाए ।
एकआपसमा ठोक्किएपछि अचेत अवस्थामा रहेका दुवै जनालाई उपचारका लागि प्रादेशिक अस्पताल मलंगवा लगिएको थियो । तर, अस्पताल पुर्याए लगत्तै चिकित्सकले दुवैलाई मृत घोषणा गरेका थिए ।
दुर्घटनामा बीआर ३० एपी १२२४ नम्बरको मोटरसाइकलमा पछाडि सवार कविलासी नगरपालिका–८ का ३३ वर्षीय सुरेन्द्र पासवान र मलङ्गवा नगरपालिका–६ का १८ वर्षीय बब्लु कुमार घाइते भएको प्रहरी श्रोतबाट बुझिएको छ ।
घाइते दुवैको अवस्था गम्भीर रहेको प्रहरीले जनाए । उनीहरूलाई प्रारम्भिक उपचारपछि थप उपचारका लागि जनकपुर रेफर गरिएको छ ।
दुर्घटनामा दुवै मोटरसाइकल क्षतिग्रस्त भएका छन् । प्रारम्भिक अनुमान अनुसार अत्यधिक गतिका कारण दुर्घटना भएको हुनसक्ने तथा घटना सम्बन्धमा प्रहरीले थप अनुसन्धान भइरहेको डिएसपी वेदप्रसाद गौतमले जानकारी दिए ।
बजार व्यवसायलाई चलायमान बनाउन गौरमा मंसिर ६ देखि ‘रौतहट एक्सपो २०८३’, लण्डन ब्रिज र जलपरी मुख्य आकर्षण
गौर आँखा अस्पतालद्वारा मौलापुरमा निःशुल्क आँखा शिविर, ३२६ जनाको परीक्षण, ७६ जना शल्यक्रियाको लागि छनौंट
उमेर हद खारेजीको माग गर्दै विगत १८ दिन देखि आन्दोलनरत वागमती सिंचाई आयोजनाका कर्मचारी प्रति राज्य उदाशिन