रौतहट, ९ असोज । रौतहटमा १९ वर्षअघि गोली प्रहार गरेर दुई जनाको हत्या भएका घटनाको अनुसन्धानबाट तत्कालिन तराई जनतान्त्रिक मुक्ति मोर्चामा आवद्ध सुरेन्द्र यादवको मुख्य संलग्ता रहेको रौतहट प्रहरीले पुष्टि गरेको छ ।
जिल्ला प्रहरी कार्यालय रौतहटद्वारा जारी प्रेस नोटमा, प्रहरीले घटनामा संलग्न रहेको आरोपमा हाल जिल्ला कारागार गौरमा सजाय भुक्तान गरिरहेका एक व्यक्तिको पहिचान गरी थप अनुसन्धान अघि बढाएको हो ।
२०६४ साल वैशाख ३१ गते राति करिब १ बजेको समयमा तत्कालीन धरमपुर गाविस–१, हाल गढीमाई नगरपालिका–६ मा दुई जना माथि अज्ञात समूहले गोली प्रहार गरी हत्या गरेको थियो ।
घटनामा परेर तत्कालीन पिपरिया (दो.) गाविस–३, हाल गरुडा नगरपालिका–७ का ३२ वर्षीय नागेन्द्र बैठा र तत्कालीन गेड्हीगुठ्ठी गाविस–९, हाल गरुडा नगरपालिका–२ का २८ वर्षीय प्रमानन्द सहनीको मृत्यु भएको प्रहरीको जारी प्रेस नोटमा उल्लेख छ ।
घटना पश्चात लामो समयसम्म हत्यामा संलग्न व्यक्ति वा समूहको पहिचान हुन सकेका थिएन । तर, घटनाको निरन्तर अनुसन्धानका क्रममा जिल्ला कारागार गौरमा अपहरण तथा शरीर बन्धक र संगठित अपराध सम्बन्धी मुद्दामा सजाय भुक्तान गरिरहेका ‘वारुद सिंह’ भन्ने सुरेन्द्र प्रसाद यादवको मुख्य संलग्नता रहेको पुष्टि भएको जिल्ला प्रहरी कार्यालयका सूचना अधिकारी एवं डिएसपी बसन्त गौतमले जानकारी दिए ।
उनका अनुसार यादव तत्कालीन समयमा तराई जनतान्त्रिक मुक्ति मोर्चा (बारुद सिंह) नामबाट परिचित भई भूमिगत संगठनमा सक्रिय रहेको पाइएको छ ।
घटनाको अनुसन्धानका क्रममा १९ वर्षपछि अभियुक्तको पहिचान खुलेपछि प्रहरीले हत्याको घटनासँग सम्बन्धित थप प्रमाण तथा तथ्य संकलन गर्ने काम अघि बढाएको उनले भने ।
लामो समयदेखि अनुत्तरित रहेको उक्त दोहोरो हत्याको घटनामा नयाँ तथ्य सार्वजनिक भएपछि अनुसन्धानबाट घटनाको वास्तविकता थप स्पष्ट हुने डिएसपी गौतमले बताए ।
बजार व्यवसायलाई चलायमान बनाउन गौरमा मंसिर ६ देखि ‘रौतहट एक्सपो २०८३’, लण्डन ब्रिज र जलपरी मुख्य आकर्षण
गौर आँखा अस्पतालद्वारा मौलापुरमा निःशुल्क आँखा शिविर, ३२६ जनाको परीक्षण, ७६ जना शल्यक्रियाको लागि छनौंट
उमेर हद खारेजीको माग गर्दै विगत १८ दिन देखि आन्दोलनरत वागमती सिंचाई आयोजनाका कर्मचारी प्रति राज्य उदाशिन