basic instructions for joining zoom meeting how do i join a zoom meeting on my pc why zoom is not working in my laptop zoom download version zoom online classes app download and install zoom on windows 10 zoom meeting download windows download zoom meetigs app

राहुल गान्धी ठमेलको नाइट क्लवमा, भारतीय राजनीतिक वृतमा हल्लिखल्लि

   २१ बैशाख २०७९, बुधबार १२:३१  

काठमाडौं । भारतीय राष्ट्रिय काँगे्रस पार्टीका नेता राहुल गान्धी अकसमात काठमाडौ आएको छ ।
काठमाडौं आइपुगेका काँग्रेस नेता गान्धी ठमेलको एक नाइट क्लबमा पुगेको विषयले भारतमा हल्लिखल्लि मचाएको हो । साथीको विवाहमा सहभागी हुन सोमबार नेपाल आइपुगेका गान्धी सोही रात ठमेलको एउटा नाइट क्लब पुगेको चर्चाको विषय बनेका छन् । गान्धीको निजी भ्रमण भएको भन्दै कुनै औपचारिक कार्यक्रम सार्वजनिक गरिएको छैन ।
भारतीय सामाजिक सञ्जाल प्रयोगकर्ता, सञ्चार माध्यम र राजनीतिक वृत्तले भने मंगलबार दिनभर गान्धीको नाइट क्लबमा रमाइरहेको भिडियो फुटेज शेयर गर्दै विभिन्न टिकाटिप्पणी गरिरहेका छन् । विशेष गरी भारतको सत्तारुढ दल भारतीय जनता पार्टी (भाजपा) र गान्धीको पार्टी भारतीय राष्ट्रिय कांग्रेसका समर्थक र नेताहरूबीच यस विषयलाई लिएर तीखो सवाल–जवाफ चलिरहेको छ ।
राहुल गान्धी किन आए नेपाल ?
गान्धी सोमबार साँझ करिब पौने ५ बजे भिस्तरा एयरलाइन्सको जहाजबाट काठमाडौंको त्रिभुवन विमानस्थलमा ओर्लिएका थिए । सुरक्षा स्रोतका अनुसार विमानस्थलबाट गान्धी सिधै आफना लागि बुक गरिएको होटल मेरियट नक्शाल पुगेका थिए । उनी अहिले पनि सोही होटलमा बसिरहेका छन् । उनी साथी सुम्निमा उदासको विवाहमा सहभागी हुन नेपाल आएका हुन् ।
सुम्निमा म्यानमारका लागि नेपाली पूर्वराजदूत भीम उदासकी छोरी हुन् । उनले लामो समय अमेरिकी समाचार संस्था सीएनएनमा काम गरेकी थिइन् । उनको लिंकदेन प्रोफाइलमा उल्लेख भएअनुसार सन् २०१० देखि २०१७ सम्म उनले सीएनएनका लागि दिल्लीबाट रिपोर्टिङ गरेकी थिइन् । त्यसअघि र पछि पनि उनले सीएनएनको विभिन्न जिम्मेवारीमा रहेर काम गरेको प्रोफाइलबाट खुल्छ । उनी हाल लुम्बिनी संग्रहालयकी संस्थापक तथा कार्यकारी निर्देशक रहेकी छिन् । दिल्लीमा रहेर पत्रकारिता गर्ने क्रममा गान्धी र उदासबीच मित्रता रहेको भारतीय सञ्चार माध्यमहरूले जनाएका छन् ।
सुम्निमाका बुवा पूर्वराजदूत उदासले गान्धी सहित अन्य मुलुकबाट पनि पाहुनाहरू आएका र बिहीबार फर्किने तय भएको बताए । ‘छोरीको विवाह कार्यक्रम चलिरहेको छ । विभिन्न मुलुकबाट गरेर २५ जना पाहुना आउनु भएको छ,’ उदासले भने, ‘उहाँहरू मेरी छोरीको पाहुना हुनुहुन्छ, ५ तारिखमा र्फकनु हुन्छ ।’ अहिलेसम्म गान्धीको भ्रमणबारे प्रतिक्रिया दिइरहेको उदास परिवारले उनका अन्य कार्यसूचीका विषयमा भने जानकारी दिएको छैन ।
निजी भ्रमण, सम्बन्धित निकाय बेखबर
गान्धी नेपाल भ्रमणमा आएको विषयमा सम्बन्धित निकायलाई औपचारिक जानकारी भने छैन ।

नेपालको परराष्ट्र मन्त्रालय र भारतीय राजदूतावासले उनको निजी भ्रमण भएकाले यस विषयमा औपचारिक जानकारी नभएको बताएका छन् । परराष्ट्र मन्त्रालयकी प्रवक्ता सेवा लम्सालले यो गान्धीको निजी भ्रमण भएकाले मन्त्रालयसँग समन्वय नभएको बताइन् । ‘यो उहाँको निजी भ्रमण हो । परराष्ट्रको समन्वयमा भएको होइन,’ प्रवक्ता लम्सालले भनिन्, ‘निजी भ्रमणको विषय भएकाले औपचारिक जानकारी छैन ।’ उनले सरकारी तहमा भेटघाटको कार्यक्रमबारे समेत मन्त्रालयलाई जानकारी नरहेको बताइन् ।
त्यस्तै नेपालस्थित भारतीय राजदूतावासले पनि उनको भ्रमणका विषयमा जानकारी नभएको बताएको छ । दूतावासका प्रथम सचिव नवीन कुमारले यो गान्धीको नितान्त व्यक्तिगत भ्रमण भएको बताए । ‘यो उहाँको नितान्त व्यक्तिगत भ्रमण हो । दूतावाससँग कुनै सम्बन्ध छैन,’ उनले भने ।
‘जेड प्लस’ सुरक्षामा रहन्छन् गान्धी
भारतको प्रमुख विपक्षी दल राष्ट्रिय कांग्रेसका नेतासमेत रहेका गान्धीको सुरक्षाको विषयमा विशेष चासो रहन्छ । यो उनको निजी भ्रमण भएका कारण पनि औपचारिक जानकारी नगराएका हुन सक्छन् । तर, भारतमा ‘जेड प्लस’ सुरक्षा घेरामा रहने गान्धी नेपाल आउँदा जानकारी विना नै आउनुलाई असामान्य रुपमा हेरिएको छ । साथै, उनले नेपालमा आफूलाई त्यति धेरै असुरक्षित महसुस नगरेका कारण पनि सुरक्षा व्यवस्थालाई महत्व नदिएको हुनसक्ने अनुमान गरिएको छ ।
भारतीय टेलिभिजन एनडिटीभीको अनलाइन संस्करणमा प्रकाशित सामग्रीका अनुसार सन् २०१९ यता गान्धी ‘जेड प्लस’ सुरक्षा व्यवस्थामा रहने गरेका छन् । त्यसअघि गान्धी परिवारका लागि स्पेसन प्रोटेक्सन ग्रुप (एसपीजी) सुरक्षा व्यवस्था हुन्थ्यो । जसमा ३ हजारभन्दा बढी सुरक्षाकर्मीहरू हुन्थे । जुन अहिले भारतीय प्रधानमन्त्री नरेन्द्र मोदीका लागि मात्रै राख्ने गरिएको छ । एनडिटीभीका अनुसार ‘जेड प्लस’ सुरक्षा घेरामा भने सेन्ट्रल रिजर्भ पोलिस फोर्स (सीआरपीएफ) का १ सय जना सुरक्षाकर्मी रहन्छन् ।
तर, नेपाल प्रहरीलाई उनी कुन–कुन र कति जनाको टिमसहित आएका छन् भन्ने समेत यकिन छैन । नेपाल प्रहरीका प्रवक्ता एवम् प्रहरी वरिष्ठ उपरीक्षक विष्णु कुमार केसीले गान्धीको भ्रमण व्यक्तिगत रहेको भन्ने मात्रै जानकारीमा रहेको बताए । ‘उहाँको व्यक्तिगत भ्रमण हो भन्ने जानकारी हामीलाई छ । त्यसबाहेक थप जानकारी छैन,’ प्रवक्ता केसीले भने, ‘त्यहीअनुसार हामीले आवश्यक सुरक्षा प्रवन्ध गरेका छौं ।’
गान्धी भने सोमबार राति ठमेलस्थित एक नाइट क्लबमा पुगेर रमाइरहेको भिडियो र तस्वीर सार्वजनिक भएका छन् । क्लबले पनि उनी राति पुगेको पुष्टि गरेको छ । विना सुरक्षाकर्मी गान्धी नाइट क्लबमा पुगेको खबर भएपछि त्यहाँको सुरक्षा व्यवस्था कडा बनाइएको थियो । उनी पुगेको क्लब एलओडीका अनुसार गान्धी २५ जनाको टोली सहित पुगेका थिए । मध्यरातमा ठमेल पुगेर डेढ घण्टा त्यहाँ बिताएका गान्धीको सुरक्षा व्यवस्था क्लबकै सुरक्षा गार्डले मिलाएका थिए ।

क्लबको भीआईपी सेक्सनमा उनले ‘सफ्ट ड्रिंक’ पिएको खुलेको छ । सार्वजनिक भएको भिडियोमा क्लब भित्रको लाइट र चमकधमकमा उनी केही समय हल्लिएको देखिन्छ ।
भाजपा र कांग्रेसबीच सवालजवाफ


भारतीय सत्तारुढ दल भाजपाले भने गान्धी नेपालको नाइट क्लबमा पुगेको भिडियोलाई लिएर व्यापक आलोचनाको विषय बनाएको छ । भाजपाका विभिन्न तहका नेता र मन्त्रीहरूले नै सामाजिक सञ्जालमा चर्को टिप्पणी गरिरहेका छन् ।
भाजपाको सूचना प्रविधि विभागका इञ्चार्ज अमित मालवीयले राहुल क्लबमा उभिएको भिडियो क्लिप राख्दै ट्विटरमा लेखेका छन्, ‘मुम्बईमा हमला भइरहेका बेला राहुल गान्धी नाइट क्लबमा थिए । अहिले उनको पार्टी संकटमा भएका बेलामा पनि उनी नाइट क्लबमै छन् । उनी लगनशील छन् ।’ उनले कांग्रेसले राष्ट्रपति जस्तै प्रधानमन्त्रीको उम्मेदवार पनि आउटसोर्सिङ गर्नुपर्ने अवस्था रहेको व्यंग्य गरेका छन् ।
भाजपा प्रवक्ता शहजाद पूनावालाले ‘राहुल गान्धीले के गरिरहेका छन्, भन्ने उनको निजी मामिला भएपनि राजस्थानको जोधपुरमा भइरहेको हिंसामा चिन्ता व्यक्त गर्नुको साटो नेपालको नाइटक्लबमा पार्टी गरिरहेको’ भन्दै आलोचना गरेका छन् ।
केन्द्रीय कानुन न्यायमन्त्री किरेन रिजिजुले राहुल गान्धीको भिडियो शेयर गर्दै ‘अरूलाई उपदेश दिन सजिलो हुने तर, आफूले कार्यान्वयन गर्न नपर्ने ?’ भन्दै प्रश्न गरेका छन् । भाजपाका नेता कपिल मिश्राले त भिडियो क्लिपमा गान्धीसँग देखिएकी युवतीलाई लक्षित गर्दै चिनियाँ एजेन्टको दबावमा भारतको सेनाविरुद्ध ट्वीट गर्ने गरेको आरोप लगाएका छन् ।
भारतीय कांग्रेसले भाजपाले आलोचना गरेपछि गान्धीको प्रतिरक्षा गर्दै नाइट क्लब गएको विषयमा अनावश्यक विवाद सिर्जना गरेको टिप्पणी गरेको छ । कांग्रेस प्रवक्ता रणदीप सुर्जेवालाले गान्धी नेपालमा साथीको विवाहमा गएको भन्दै त्यसलाई मोदीले पाकिस्तानका प्रधानमन्त्री नवाज शरिफसँग केक काटेको भन्दा कम गम्भीर भएको जवाफ दिए । ‘साथीभाइ, परिवार हुनु हाम्रो संस्कृतिको हिस्सा हो । विवाहमा जानु कुनै अपराध होइन,’ सुर्जेवालाले नियमित पत्रकार सम्मेलनमा भने, ‘आजबाट भाजपाले विवाहमा उपस्थिति हुनुलाई गैरकानुनी बनाउन सक्छ । त्यसो भए अब विवाहमा जाँदा पनि भाजपासँग सोधेर जानुपर्ने हो ?’ उनले भाजपा नेताहरू माथि व्यंग्य गर्दै साथी बनाउनु र उनीहरूको विवाहमा सामेल हुनु अपराध हुने भए पूर्वजानकारी गराउन समेत भाजपालाई अनुरोध गरे ।
पत्रकार सम्मेलनमा सुर्जेवालाले उक्त घटना सन् २०१५ मा प्रधानमन्त्री नरेन्द्र मोदीले पाकिस्तानका प्रधानमन्त्री नवाज शरिफसँग केक काट्न पुग्नु भन्दा कम गम्भीर भएको बताए । यसैलाई विषयवस्तु बनाएर भारतीय सञ्चार माध्यमहरूले पनि मंगलबार दिनभर अनेक सामग्री प्रकाशन गरे । केही अनलाइनहरूले सुम्निमा उदासका बारेमा समेत भारत विरोधी प्रोपागान्डिस्ट भनेर सामग्री बनाएका थिए । आज तक लगायत टेलिभिजन च्यानलहरूले पनि गान्धी नेपालको नाइट क्लब गएको विषयलाई प्राथमिकता दिइरहेका छन् । अनलाईन खबरबाट साभार गरिएको ।

फेसबुकबाट तपाईको प्रतिक्रिया सबै