मतपेटिका लुटेर भाग्ने मध्ये एक पक्राउ

रौतहट, ६ जेठ । रौतहटको यमुनामाई गाउँपालिका २ भेडियाही माध्यमिक विद्यालय मतदान केन्द्रबाट मतपेटिका लुटेर भाग्ने कार्यमा संलग्न रहेको आरोपमा रौतहट प्रहरीले शुक्रवार पक्राउ गरेको छ ।
२०७९ वैशाख ३० गते भएको स्थानीय तहको मतदानको क्रममा सोही गाउँपालिका २ का ४६ बर्षिय चन्देश्वर बैठालाई प्रहरीले आज दिउसो पक्राउ गरेको हो । चुनावको दिन मतदान केन्द्र भित्र जबरजस्ती प्रवेश गरी केही स्थानीयहरुले मतपेटी लिएर भाग्न थालेपछि मतपेटीका नियन्त्रणमा लिनको लागि सुरक्षाकर्मीले केही राउण्ड हवाई फायर समेत गरेका थिए ।
घटना पश्चात् फरार भएको आरोपीहरुलाई छुकीछिपी घरमै बस्दै आएको अवस्थामा आज निजलाई हिरासतमा लिएको जिल्ला प्रहरी कार्यालय रौतहटले जनाएको छ । पक्राउ परेका वैठा विरुद्ध निर्वाचन ऐन अनुसार कारवाही प्रक्रिया अघि बढाइएको जनाएको छ । घटनामा संलग्न अन्य फरार आरोपीहरुको खोजी जारी रहेको छ ।