रसिया र नेपालको खेलकुद मन्त्री विच खेलकुद सहयोग कार्ययोजना सम्झौतामा हस्ताक्षर

   ४ असार २०७९, शनिबार १८:१७  

मास्को । काठमाडौं । रसियाको भ्रमणमा रहेका नेपालको युवा तथा खेलकुदमन्त्री महेश्वर गहतराजले रसिया—नेपाल खेलकुद सहयोग कार्ययोजनामा संयुक्त रुपमा सम्झौता पत्रमा हस्ताक्षर गरेका छन् ।
रुस सरकारको औपचारिक निमन्त्रणामा त्यहाँको भ्रमणका क्रममा रहेका मन्त्री गहतराज र रुसका खेलकुदमन्त्री आलेग भासिलिभिच बिच दुईपक्षीय कार्ययोजनामा संयुक्त हस्ताक्षर गरेका हुन् ।
भ्रमणको दोस्रो दिन मन्त्री गहतराजको प्रतिनिधि मण्डल र रुसका खेलकुद मन्त्री आलेग भासिलिभिच सँग शिष्टाचार भेटवार्ता समेत भएको थियो । सो भेटवार्ताका क्रममा दुवै देशको हितका विषयमा छलफल भएको बताइएको छ । नेपालको उच्च पहाडी क्षेत्रमा खेल पूर्वाधार निर्माण, खेलाडी तथा प्रशिक्षकको क्षमता अभिवृद्धि, दुवै राष्ट्रबीच मैत्रीपूर्ण तथा प्रतिष्पर्धात्मक खेलहरुको आदान–प्रदान तथा नेपाली खेलाडी र विद्यार्थीलाई खेल विज्ञान पढ्नका लागि छात्रवृत्ति सहयोग लगायत विषय समेटिएको “रसिया–नेपाल खेलकुद सहयोग कार्ययोजना” मा दुवै देशका खेलकुद मन्त्रीले हस्ताक्षर गरेका हुन् ।
सो अवसरमा बोल्दै रसियाका खेलकुद मन्त्री आलेग भासिलिभिचले नेपाली खेलाडी तथा विद्यार्थीहरुलाई खेल विज्ञान पढ्न छात्रवृत्ति दिने, खेलाडी र प्रशिक्षकहरुलाई तालिम दिने तथा दुवै देशबीच मैत्रीपूर्ण खेल आयोजना गर्ने विषयमा रुस उत्साहित भएको बताए ।
मन्त्री गहतराजले नेपाल र रुसबीचको ६६ वर्ष लामो कुटनीतिक सम्वन्धमा यस भ्रमणले खेलकुद डिप्लोमेसीमार्फत थप सुदृढ र सुमधुर सम्बन्ध स्थापित हुने विश्वास व्यक्त गरे ।

उनले खेललाई कुटनीतिको प्रमुख अंग बनाउँदै आर्थिक, पर्यटन तथा अन्य विधासँग सामानजस्यता बढाउन आवश्यक रहेको उल्लेख गर्दै खेल पूर्वाधार र खेलका समग्र क्षेत्रमा रुसले कायम गरेको आफ्नै विशिष्ट क्षमताको समेत प्रशंसा गरेका थिए

मन्त्री गहतराजले रसियाका खेलकुद मन्त्रीलाई नेपाल भ्रमणको औपचारिक निमन्त्रणा समेत दिएका छन् । मन्त्रालयका सचिव रेग्मीसहित रुसको भ्रमणमा रहेका गहतराज असार ३ गते स्वदेश फर्कने कार्यक्रम रहेको छ ।

फेसबुकबाट तपाईको प्रतिक्रिया सबै